ডিজিটেল ডেস্কঃ সৰুতে হয়তো আপুনিও দেখিছিল। যেতিয়া কোনোবাই এমুঠি চাউল চতিয়াই দিছিল তেতিয়া ঘৰ বা ভড়াৰ মূধচৰ পৰা এজাক ঘৰচিৰিকা আহি সেই চাউলবোৰ হেপাঁহ পলুৱাই খাইছিল। কিন্তু লাহে লাহে সেই দৃশ্য এতিয়া দুৰ্লভ হৈ পৰিছে। সলনি হোৱা পৰিৱেশৰ লগত কৰবাত হেৰাই গৈছে সেই ঘৰচিৰিকাজাক। আজি  সেই হেৰাই যোৱা ঘৰচিৰিকাজনীৰ বাবে এটা বিশেষ দিন। কিয়নো আজি বিশ্ব ঘৰচিৰিকা দিৱস।

২০১০ চনত ভাৰতত প্ৰথমবাৰৰ বাবে এই দিৱস উদযাপন কৰা হৈছিল আৰু তাৰ পিছৰে পৰা বিশ্বৰ কেইবাখনো দেশত এই দিৱস পালন কৰা হয়। বিশ্ব ঘৰচিৰিকা দিৱস এটা গুৰুত্বপূৰ্ণ উদযাপন যিয়ে ঘৰচিৰিকাৰ তাৎপৰ্য আৰু ইয়াৰ সংৰক্ষণৰ ওপৰত আলোকপাত কৰে। ঘৰচিৰিকা সংৰক্ষণক প্ৰসাৰিত কৰি আৰু ঘৰচিৰিকাৰ অনুকূল বাসস্থান সৃষ্টি কৰি মানুহে এই সৰু চৰাইবোৰৰ সুৰক্ষাত অৰিহণা যোগাব পাৰে।

ফ্ৰান্সৰ Eco-Sys Action Foundationৰ সহযোগত Nature Forever Society of Indiaৰ উদ্যোগত বিশ্ব ঘৰচিৰিকা দিৱস উদযাপন কৰা হৈছিল। ২০১০ চনৰ ২০ মাৰ্চত প্ৰথম বিশ্ব ঘৰচিৰিকা দিৱস উদযাপন কৰা হৈছিল আৰু ইয়াৰ লক্ষ্য আছিল ঘৰচিৰিকাৰ সংখ্যা হ্ৰাস পোৱা আৰু ইয়াৰ সংৰক্ষণৰ প্ৰয়োজনীয়তাৰ বিষয়ে সজাগতা সৃষ্টি কৰা।

২০২৩ চনৰ বিশ্ব ঘৰচিৰিকা দিৱসৰ থিমটো বিগত বছৰৰ থিমৰ ধাৰাবাহিকতা। এই বছৰৰ বিষয়বস্তু হৈছে “মই ঘৰচিৰিকা ভাল পাওঁ,” যিয়ে ঘৰচিৰিকা সংৰক্ষণৰ ক্ষেত্ৰত ব্যক্তি আৰু সম্প্ৰদায়ৰ ভূমিকাক গুৰুত্ব আৰোপ কৰে।