ডিজিটেল ডেস্কঃ দুটাকৈ নৃশংস হত্যাকাণ্ড সংঘটিত কৰা বন্দনা কলিতা ওৰফে বন্দনা দেক লৈ  এতিয়া সৰ্বত্ৰে চৰ্চা। এনে নিকৃষ্ট কাম কৰা বন্দনাৰ শাস্তি হিচাপে একাংশই দাবী কৰিছে ফাঁচী। চাৰিওদিশে বন্দনাই সংঘটিত কৰা এই হত্যাকাণ্ডৰ বিৱৰণৰ মাজতে লাহে লাহে পোহৰলৈ আহিছে বন্দনা আৰু তেওঁৰ স্বামী অমৰজ্যোতিৰ বৈবাহিক সম্পৰ্কৰ কিছু কথা।

প্ৰাপ্ত তথ্য অনুসৰি ২০১২চনতে বন্দনাক পলুৱাই আহিছিল অমৰজ্যোতিয়ে। সেই সময়ত নাৱালিকা আছিল বন্দনা। দুয়োখনৰ অমতত বিয়া হোৱাৰ বাবে বন্দনাক প্ৰায় এৰি দিছিল পিতৃ-মাতৃৰ লগতে ভাতৃয়ে। ইফালে অমৰজ্যোতিৰ ঘৰতে সহজভাৱে লোৱা নাছিল এই বৈবাহিক সম্পৰ্ক।

দিন বাগৰিছিল। অমৰজ্যোতিৰ ঘৰত থাকিবলৈ লৈছিল বন্দনাই। কিন্তু অমৰজ্যোতিৰ পৰিয়ালে কৈছিল যে, এটা নিৰ্দিষ্ট সময়ৰ পাছতহে তেওঁ অমৰজ্যোতিৰ পত্নীৰ মৰ্যদা লাভ কৰিব। এনেকৈয়ে প্ৰায় ৮বছৰ সময় পাৰ হৈছিল। অৱশেষত ২০২০চনত আনুষ্ঠানিকভাৱে বিবাহ সম্পন্ন হৈছিল দুয়োৰে মাজত।

২০১২ত অমৰজ্যোতিৰ সৈতে বন্দনা গুচি অহাৰ কিছুদিনৰ পাছত অমৰজ্যোতিয়ে কোনো কাম কৰা নাছিল। যাৰফলত বন্দনাই কল চেন্টাৰত কাম কৰি পৰিয়াল চলাইছিল বুলিও পোহৰলৈ আহিছে। মুঠৰ ওপৰত সকলো দিশ এতিয়া যেন ধূসৰ।  আৰক্ষীৰ তদন্ত শেষ নোহোৱালৈকে কোনো কথাই স্থিৰকৈ কব নোৱাৰি। সেয়া যি কি নহলেও, এই সমগ্ৰ কাণ্ডত বন্দনাই যে মুখ্য অভিযুক্ত সেয়া কিন্তু নিশ্চিত।