এক পৰ্যালোচনা বৈঠকত বিত্তমন্ত্ৰী নিৰ্মলা সীতাৰমণে ইউ পি আইৰ আন্তঃগাঁথনিৰ অভাৱ দূৰ কৰিবলৈ সকলোকে একেলগে কাম কৰিবলৈ কয়। যোৱা কেইদিনমানত ইউপিআই ব্যৱহাৰকাৰীসকলে পেমেণ্ট কৰাৰ ক্ষেত্ৰত বহু সমস্যাৰ সন্মুখীন হ’বলগীয়া হৈছিল, যাৰ বাবে এই বৈঠকখন গুৰুত্বপূৰ্ণ আছিল। ১২ এপ্ৰিলত ইউপিআইত পেমেণ্ট ট্ৰেন্সফাৰ সন্দৰ্ভত অভিযোগ উত্থাপন হৈছিল। যোৱা এমাহত তৃতীয়বাৰৰ বাবে এই সমস্যাৰ সৃষ্টি হৈছিল। ইয়াৰ পূৰ্বে ২৬ মাৰ্চ আৰু ২ এপ্ৰিলত ইউপিআই পেমেণ্টতো সমস্যা দেখা গৈছিল।

অসুবিধা ৰোধ কৰিবলৈ কেনেকৈ পদক্ষেপ লব লাগে তাৰ নিৰ্দেশনা-

এতিয়া বিত্তমন্ত্ৰী নিৰ্মলা সীতাৰমণে এন পি চি আইক নিৰ্দেশ দিছে যে ইউ পি আই আৰু অধিক শক্তিশালী কৰাৰ লগতে কোনো ধৰণৰ সমস্যা ৰোধৰ বাবে পদক্ষেপ ল’ব লাগে। বিত্ত মন্ত্ৰালয়ে এক্সৰ ওপৰত এটা পোষ্টত কয় যে, ‘বিত্তমন্ত্ৰী নিৰ্মলা সীতাৰমণে সকলো পক্ষকে একেলগে কাম কৰি আন্তঃগাঁথনিৰ অভাৱ দূৰ কৰিবলৈ, ব্যৱহাৰকাৰীৰ অভিজ্ঞতা উন্নত কৰিবলৈ আৰু চাইবাৰ সুৰক্ষা শক্তিশালী কৰিবলৈ নিৰ্দেশ দিছে।’ তেওঁ আগন্তুক ২-৩ বছৰত দৈনিক এক বিলিয়ন ইউপিআই লেনদেনৰ লক্ষ্যত উপনীত হোৱাৰ কথাও উল্লেখ কৰে।

ইউপিআইৰ বিশ্বব্যাপী সম্প্ৰসাৰণ-

বিত্তমন্ত্ৰীয়ে আন্তঃৰাষ্ট্ৰীয় পৰ্যায়ত ইউপিআইক প্ৰচাৰ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ কয় যে ইয়াৰ বাবে আন্তঃৰাষ্ট্ৰীয় গাঁথনি গঢ়ি তোলা আৰু বিশ্বব্যাপী পেমেণ্ট ব্যৱস্থা সম্প্ৰসাৰণ কৰাৰ প্ৰয়োজন আছে। তেওঁ ইউপিআইৰ সৈতে অধিক আৰু অধিক ব্যৱহাৰকাৰী আৰু ব্যৱসায়ীক সংযোগ কৰাৰ প্ৰচেষ্টা ক্ষিপ্ৰ কৰিবলৈ কয়, যাতে ইয়াৰ প্ৰসাৰ আৰু প্ৰভাৱ বৃদ্ধি পায়।

ইউপিআইৰ জনপ্ৰিয়তা-

ইউপিআই হৈছে এক তৎক্ষণাত পেমেণ্ট ব্যৱস্থা, যিটো এনপিচিআইয়ে বিকশিত কৰিছে আৰু ইয়াক কেৱল এনপিচিআইয়েহে পৰিচালনা কৰে। ইয়াক ভাৰতীয় ৰিজাৰ্ভ বেংক (আৰ বি আই)ৰ দ্বাৰা নিয়ন্ত্ৰিত। ২০১৯-২০ চনৰ পৰা ২০২৪-২৫ চনলৈকে ইউপিআইৰ লেনদেনত ৭২% বাৰ্ষিক বৃদ্ধি পোৱা গৈছে। এন পি চি আইৰ বিষয়াসকলে জনোৱা মতে, ২০২১-২২ চনৰ পৰা ২০২৪-২৫ চনৰ ভিতৰত ইউ পি আইত ২৬ কোটি নতুন ব্যৱহাৰকাৰী আৰু ৫.৫ কোটি নতুন ব্যৱসায়ী সংযোজন হ’ব। বৰ্তমান ইউপিআইত প্ৰায় ৪৫ কোটি সক্ৰিয় ব্যৱহাৰকাৰী আছে।