ডিজিটেল ডেস্কঃ সদায়ে দেখি থকা ঘটনাবোৰে মানুহক ভাৱিবলৈ বাধ্য কৰাইছে যে, বৰ্তমান সময়ত টকাই সকলো। টকাৰ আগত মূল্যবোধ, সততা সকলো অসাৰ। কিন্তু শেহতীয়াকৈ ঘটা এক ঘটনাই সমগ্ৰ দেশক ভাৱিবলৈ বাধ্য কৰালে যে,  ধনৰ অভাৱ হলেও আজিও এনে বহু লোক আছে যিয়ে টকাতকৈ মানৱতা আৰু মূল্যবোধক আগস্থান দিয়ে।

লোকজনৰ নাম নীলাম্বৰ সিনহা। যান-বাহন আৰক্ষীত তেওঁ কৰ্মৰত।  কৰ্তব্যৰ সময়তে তেওঁ হঠাতে মন কৰিলে ৰাস্তাত এটা বেগ পৰি আছে। তেওঁ বেগটো উঠাই দেখিলে যে বেগটোত ২০০০ আৰু ৫০০টকীয়া নোটেৰে ভৰি আছে। বেগটো লগে লগে তেওঁ স্থানীয় থানাত জমা দিয়ে আৰু থানাৰ কৰ্তৃপক্ষই হিচাপ কৰি দেখে যে বেগটোত আছিল ৪৫লাখ টকা। বেগটোৰ গৰাকীক বিচাৰি থানাৰ কৰ্তৃপক্ষই এক সংবাদমেল যোগে এই কথা ঘোষণা কৰিছে। লগতে নীলাম্বৰ সিনহাই এই বেগটো হেৰাই পাই পুলিচক জমা দিয়া বুলি সদৰি কৰিছে।

নীলাম্বৰৰ এই কাৰ্যৰ পিছতে ছচিয়েল মিডিয়াত বনজুইৰ দৰে বিয়পি পৰিল এই খবৰ। এগৰাকী সাধাৰণ আৰক্ষী কৰ্মীৰ এই সততা দেখি জিলা প্ৰশাসনেও নীলাম্বৰক লৈ গৌৰৱবোধ কৰিছে। ঘটনাৰ সন্দৰ্ভত নীলাম্বৰে কয়- বেগটো দেখি মই ভাৱিলো কোনোবাই হয়তো বহু কষ্টৰে এই টকাখিনি উপাৰ্জন কৰিছে। গতিকে টকাখিনিৰ আচল গৰাকীয়ে বেগটো পোৱাটো মই বিচাৰিছিলো। আৰু সেই কাৰনে থানালৈ লৈ আহিছিলো।

নীলাম্বৰে লগতে কয়- ধনৰ দুখীয়া হব পাৰো, কিন্তু লোভ নাই। মই মোৰ কৰ্মৰে যিখিনি কৰিছো তাত মই আৰু পৰিয়াল সুখী।  উল্লেখ কৰা প্ৰয়োজন যে, নীলাম্বৰ চত্তীশগড়ৰ ৰায়পুৰৰ আৰক্ষী কৰ্মী

ভোগবাদীৰ এই পৃথিৱীখনত নীলাম্বৰৰ দৰে মানুহৰ বাবেই হয়তো আজিও মূল্যবোধ জীয়াই আছে। চেল্যুট নীলাম্বৰ….