ডিজিটেল ডেস্কঃ বলীউডৰ ভাইজান ছলমানে খানে যেতিয়া কাৰোবাক পছন্দ কৰে তেতিয়া তেওঁৰ বাবে হিয়া-উজাৰি সকলো দিয়ে৷ শ্বেহনাজৰ ঘটনাই পুনৰ এবাৰ সেই কথাই প্ৰমান কৰিছে৷ বিগবছ-১৩ লৈ অহা পঞ্জাৱৰ এগৰাকী সাধাৰণ গায়িকা তথা অভিনেত্ৰী শ্বেহনাজ গীল৷ বিগ বছত আহিয়েই ছলমানৰ মন প্ৰথম দিনাই জয় কৰিছিল শ্বেহনাজে৷

বিগ বছ শেষ হোৱাৰ পিছতো শ্বেহনাজেৰে সম্পৰ্ক বৰ্তাই ৰাখিছে ভাইজানে৷ তাৰেই প্ৰমাণ শেহতীয়াকৈ ছলমানৰ আহিব লগা নতুন ছবি ‘কভি ঈদ কভি দিৱালী’ত শ্বেহনাজক অভিনয়ৰ বাবে অফাৰ ভাইজানৰ৷ বলীউডত ভাইজানৰ ছবিৰেই অভিষেক ঘটিব শ্বেহনাজৰ৷ এই খবৰে এতিয়া সকলোতে বিশেষভাৱে চৰ্চা লাভ কৰিছে৷ একাংশ নেটিজেনৰ মত, ‘ভাইজানে অৱশেষত প্ৰকাশ কৰিয়েই দিলে৷’

আহিবলগীয়া নতুন ছবি ‘কভি ঈদ কভি দিৱালী’ত সহ প্ৰযোজক হিচাপে আছে ভাইজান ছলমান৷ ছলমানে ছবিখনত অভিনেতা অভিনেত্ৰীৰ তালিকাত পোনতেই ৰাখিছে শ্বেহনাজক৷ আনকি নিজেই মাতিও পঠিয়াইছে ভাইজানে৷ অভিনেতা আয়ুস শৰ্মাৰ বিপৰীতে এটা গুৰুত্বপূৰ্ণ চৰিত্ৰত দেখা যাব শ্বেহনাজক৷ ইফালে ছবিখনৰ বাবে শ্বেহনাজক কিমান পাৰিশ্ৰমিক দিয়া হ’ব সেই সন্দৰ্ভতো প্ৰকাশ হোৱা তথ্যই সকলোকে আচৰিত কৰি তুলিছে৷

বলীউডত প্ৰথমখন ছবিতেই শ্বেহনাজক পাৰিশ্ৰমিক নিজেই ধাৰ্য্য কৰাৰো স্বাধীনতা দিছে ভাইজানে৷ ছবিখনৰ বাবে কিমান পাৰিশ্ৰমিক আদায় দিব লাগিব সেই কথা ঠিৰাং কৰাই নহয় শ্বুটিঙৰ সময়ো নিজেই নিৰ্ণয় কৰিব শ্বেহনাজে৷ প্ৰযোজকে শ্বেহনাজক সময় অথবা পাৰিশ্ৰমিকৰ বাবেও হেঁচা দিব নোৱাৰিব৷

কম সময়তেই শ্বেহনাজজৰ জীৱনত বহু উত্থান-পতন৷ তথাপিও হাৰ নামানি যুঁজত অৱতীৰ্ণ হোৱা শ্বেহনাজক লৈ ভাইজানৰ নৰম ভাৱক লৈ বহুতেই চৰ্চা কৰিছিল যদিও শেহতীয়াভাৱে চিনেমাৰ বাবে দিয়া অফাৰক লৈ সকলো প্ৰায় নিশ্চিতই হৈছে৷ বৰ্তমান পঞ্জাৱৰ এখন ছবিৰ কামত ব্যস্ত শ্বেহনাজে কেতিয়াৰ পৰা ভাইজানৰ চিনেমাৰ শ্বুটিঙৰ কাম আৰম্ভ কৰিব তাৰ বাবেই বাট ৰৈছে শ্বেহনাজ অনুৰাগীয়ে৷