ক্লাছ নকৰা অথবা শিক্ষকতাৰ দায়িত্ব সুচাৰু ৰূপে পালন নাই কৰা বুলি অনুভৱ কৰি এগৰাকী শিক্ষকে উভতাই দিলে ৩৩মাহৰ দৰমহা। মুঠ  ২৩লাখ ৮২হাজাৰ ২২৮ টকাৰ চেক বিশ্ববিদ্যালয়ৰ পঞ্জীয়কক প্ৰদান কৰিলে এই শিক্ষকগৰাকীয়ে। এই শিক্ষকগৰাকীৰ নাম হৈছে  ললন কুমাৰ।  বিহাৰৰ মুজাফৰপুৰৰ নীতিশেশ্বৰ কলেজৰ সহকাৰী অধ্যাপক ললন কুমাৰে ২০১৯ চনত যোগদান কৰিছিল। কিন্তু যোগদানৰ এই ৩৩ মাহত তেওঁৰ ক্লাছত উপস্থিত নাছিল এজনো ছাত্ৰ। যাৰ বাবে লালন কুমাৰে মঙলবাৰে বি আৰ আম্বেদকাৰ বিহাৰ বিশ্ববিদ্যালয়ৰ পঞ্জীয়কক ২৩,৮২,২২৮ টকাৰ চেক প্ৰদান কৰি ৩৩ মাহৰ দৰমহা ঘূৰাই দিয়ে।

ললন কুমাৰে প্ৰকাশ কৰা অনুসৰি, ‘শিক্ষকতা নকৰাকৈ দৰমহা লোৱাৰ বাবে মোৰ বিবেকে মোক অনুমতি নিদিয়ে। যাৰ বাবে মই মোৰ দৰমহা ঘূৰাই দিছো। ‘  উল্লেখ্য যে, ক’ভিড পৰিস্থিতিত অনলাইন ক্লাছৰ সময়তো কোনো এজন ছাত্ৰই শিক্ষকজনৰ হিন্দী ক্লাছত উপস্থিত নাছিল। যাৰ বাবে তেওঁ ক্লাছ কৰিব পৰা নাছিল আৰু শেহতীয়াকৈ তেওঁ উভতাই দিলে ৩৩মাহৰ দৰমহা।