ডিজিটেল ডেস্কঃ শ্ৰীলংকাৰ ৰাষ্ট্ৰপতি গোটাবায়া ৰাজাপাকছেই পদত্যাগৰ কথা সোমবাৰে আনুষ্ঠানিকভাৱে ঘোষণা কৰিছে প্ৰধানমন্ত্ৰীয়ে। জনতাৰ ব্যাপক প্ৰতিবাদৰ সন্মুখত নতশিৰ হৈ নৌসেনাৰ জাহাজাৰে পলায়ন কৰা ৰাষ্ট্ৰপতিগৰাকী বৰ্তমান সেনাৰ এক চাউনীত আত্মগোপন কৰি আছে বুলি সদৰি কৰিছে সংবাদমাধ্যমে। উল্লেখ কৰা প্ৰয়োজন যে, দেশখনত অৰ্থনৈতিক কু-ব্যৱস্থাপনাৰ বিষয়লৈ কেইবা মাহজোৰা প্ৰতিবাদৰ অন্তত ৰাষ্ট্ৰপতি ৰাজাপাকছেৰ পদত্যাগৰ দাবীত ৰাজধানী কলম্বোত কিছুদিনৰে পৰা লাখ লাখ লোক সমবেত হৈছিল।

একাংশ প্ৰতিবাদকাৰীয়ে ৰাষ্ট্ৰপতিৰ চৰকাৰী বাসগৃহত প্ৰৱেশ কৰে আৰু প্ৰধানমন্ত্ৰীৰ বাসগৃহত জুই লগাই দিয়ে। প্ৰধানমন্ত্ৰী ৰাণীল বিক্ৰমসিংঘেও পদত্যাগ কৰিবলৈ সন্মতি প্ৰকাশ কৰিছে। দেশখনৰ সংসদৰ অধ্যক্ষ মহিন্দা অভয়বৰ্ধনে কৈছে যে, ৰাষ্ট্ৰপতিয়ে ক্ষমতাৰ শান্তিপূৰ্ণ হস্তান্তৰ সুনিশ্চিত কৰাৰ উদ্দেশ্যে পদত্যাগ কৰাৰ সিদ্ধান্ত গ্ৰহণ কৰিছে। তেওঁ লগতে জনসাধাৰণক শান্তি আইন শৃংখলা বৰ্তাই ৰাখিবলৈ আহ্বান জনাইছে। উল্লেখ কৰা প্ৰয়োজন যে, দেশখনৰ মুদ্ৰা ভাণ্ডাৰ উদং হৈছে আৰু ব্যক্তিগত বাহনৰ বাবে প্ৰেট্ৰ’ল আৰু ডিজেলৰ বিক্ৰী নিষিদ্ধ কৰিবলগীয়া হৈছে।