অন্ধ্ৰপ্ৰদেশৰ শ্ৰীহৰিকোটাৰ পৰা পিএছএলভি-চি৬০ ৰকেটৰ সহায়ত স্পাডেক্স মিছন আৰু উন্নত প্ৰযুক্তিৰ পেলোড সফলভাৱে উৎক্ষেপণ কৰিছে ভাৰতীয় মহাকাশ গৱেষণা সংস্থাই। উৎক্ষেপণৰ পিছত ইছৰোৱে কয় যে ৰকেটৰ প্ৰথম পৰ্যায়ৰ প্ৰদৰ্শন স্বাভাৱিক। এই অভিযান ভাৰতৰ মহাকাশ কাৰ্যসূচীৰ বাবে আন এক বৃহৎ সাফল্য। স্পাডেক্স মিছনৰ জৰিয়তে ইছৰোৱে পুনৰবাৰ প্ৰমাণ কৰিলে যে ভাৰত মহাকাশ বিজ্ঞানৰ ক্ষেত্ৰত আগশাৰীৰ দিশত দ্ৰুতগতিত আগবাঢ়িছে।

SpaDeX (Space Docking Experiment) অভিযান হৈছে ভাৰতৰ এক সুলভ মূল্যৰ প্ৰযুক্তি প্ৰদৰ্শন অভিযান। ইয়াৰ উদ্দেশ্য হৈছে মহাকাশত দুখন সৰু মহাকাশযান (SDX01 আৰু SDX02)ৰ মাজত ডকিং আৰু আনডকিঙৰ প্ৰযুক্তি বিকশিত আৰু প্ৰদৰ্শন কৰা।

ভাৰতীয় মহাকাশ গৱেষণা সংস্থাই (ISRO) অন্ধ্ৰ প্ৰদেশৰ শ্ৰীহৰিকোটাৰ পৰা SpaDeX আৰু উদ্ভাৱনীমূলক পেলোডৰ সৈতে PSLV-C60 উৎক্ষেপণ কৰিছে। প্ৰথম পৰ্যায়ৰ প্ৰদৰ্শন স্বাভাৱিক।

SDX01 (Chaser): এই বাহনখনে সক্ৰিয় ভূমিকা পালন কৰি লক্ষ্য বাহনখনত উপনীত হ’ব।
SDX02 (লক্ষ্য): এই বাহনখন স্থবিৰ হৈ থাকিব আৰু চেজাৰৰ সৈতে ডকিং প্ৰক্ৰিয়াত লিপ্ত হ’ব।

স্পেচ ডকিং প্ৰযুক্তি

SpaDeX মিছনৰ জৰিয়তে ভাৰতে মহাকাশ ডকিং প্ৰযুক্তি বিকশিত কৰা নিৰ্বাচিত দেশসমূহৰ তালিকাত যোগদানৰ দিশত আগবাঢ়িছে। বৰ্তমান মাত্ৰ তিনিখন দেশ (আমেৰিকা, ৰাছিয়া, আৰু চীন) এই প্ৰযুক্তি সফলতাৰে ৰূপায়ণ কৰিবলৈ সক্ষম হৈছে। ইছৰোৰ এই অভিযানে ভাৰতৰ প্ৰযুক্তিগত সামৰ্থ্যকে প্ৰতিফলিত কৰাই নহয়, মহাকাশ গৱেষণাৰ ক্ষেত্ৰতো এক নতুন বিপ্লৱ কঢ়িয়াই অনাৰ প্ৰতিশ্ৰুতি দিয়ে।

মিছনৰ গুৰুত্ব

SpaDeX অভিযানৰ প্ৰধান উদ্দেশ্য হৈছে মহাকাশত দুখন মহাকাশযানৰ মাজত নিখুঁত ৰেণ্ডেজ, ডকিং আৰু আনডকিং পদ্ধতি সফলতাৰে সম্পন্ন কৰা। মহাকাশত উপগ্ৰহ মেৰামতি, ইন্ধন ভৰোৱা আৰু মহাকাশ কেন্দ্ৰ নিৰ্মাণৰ দৰে কামৰ বাবে ভৱিষ্যতে এই প্ৰযুক্তি অত্যন্ত গুৰুত্বপূৰ্ণ হ’ব।

ভাৰতৰ বাবে ঐতিহাসিক কৃতিত্ব

কেৱল কাৰিকৰী দৃষ্টিকোণৰ পৰাই নহয়, আন্তঃৰাষ্ট্ৰীয় পৰ্যায়ত ভাৰতৰ সুনাম বৃদ্ধিৰ বাবেও SpaDeX অভিযান গুৰুত্বপূৰ্ণ। এই অভিযানে দেখুৱাইছে যে ইছৰোৱে সীমিত বাজেটৰ সৈতেও অত্যাধুনিক প্ৰযুক্তি বিকশিত কৰিব পাৰে। এই অভিযানৰ সফলতাই ইছৰ’ৰ বাবে মহাকাশত অধিক জটিল অভিযানৰ সম্ভাৱনা মুকলি কৰিব। এই অভিযান ভাৰতৰ মহাকাশ কাৰ্যসূচীক নতুন উচ্চতালৈ লৈ যোৱাৰ দিশত এক ডাঙৰ পদক্ষেপ।