ডিজিটেল ডেস্কঃ ৰাজনীতি আৰু আন্তঃৰাষ্ট্ৰীয় সম্পৰ্কৰ ওপৰত ইউএছটিএমত সমগ্ৰ ভাৰতৰ প্ৰতিনিধিসকলৰ এক চিন্তাকৰ্ষক আলোচনা চক্ৰ সম্পন্ন হয়। ইউএছটিএ-ৰ ৰাজনীতি বিজ্ঞান বিভাগ, দিছপুৰ মহাবিদ্যালয়, কৰ্মশ্ৰী হিতেশ্বৰ শইকীয়া মহাবিদ্যালয়ৰ সহযোগত ১৩ আৰু ১৪ জুন “ৰাজনীতি আৰু আন্তঃৰাষ্ট্ৰীয় সম্পৰ্কৰ সমসাময়িক বিষয়সমূহ, বিশ্ব শৃংখলাৰ গুণগত প্ৰৱণতা মূল্যায়ন” শীৰ্ষক দুদিনীয়া ৰাষ্ট্ৰীয় আলোচনাচক্ৰৰ আয়োজন কৰা হয়। টিআইএছএছ গুৱাহাটী, আলিগড় মুছলিম বিশ্ববিদ্যালয়, এনইএইচইউ, কটন বিশ্ববিদ্যালয়, গুৱাহাটী বিশ্ববিদ্যালয়, আইআইটি বোম্বাই, শিৱ নাদাৰ বিশ্ববিদ্যালয়, দিছপুৰ মহাবিদ্যালয়, বেলটোলা মহাবিদ্যালয়, কৰ্মশ্ৰী হিতেশ্বৰ শইকীয়া মহাবিদ্যালয় আৰু অন্যান্য প্ৰধান প্ৰতিষ্ঠানৰ প্ৰতিনিধিসকলেও আলোচনাচক্ৰত যোগদান কৰে।

অনুষ্ঠানটোত সমগ্ৰ দেশৰ পৰা ৫৪ জন প্ৰতিনিধিয়ে অংশগ্ৰহণ কৰে। দুদিন ধৰি চলা আন্তঃৰাষ্ট্ৰীয় ৰাজনীতি আৰু সামাজিক-ৰাজনৈতিক সম্পৰ্কৰ বিভিন্ন প্ৰাসংগিক বিষয়ৰ আলোচনা হয়। দুদিনীয়া অনুষ্ঠানটো উদ্বোধনী অধিৱেশন, তিনিটা কাৰিকৰী অধিৱেশন আৰু সামৰণি অধিৱেশনেৰে সমাপ্ত হয়। উদ্বোধনী অধিৱেশনৰ আৰম্ভণি অনুষ্ঠানত সমন্বয়ক দিপ্যায়ন চৌধুৰীয়ে প্ৰতিনিধিসকলক আদৰণি জনায়। ইউএছটিএমৰ উপাচাৰ্য অধ্যাপক জি ডি শৰ্মাই আলোচনাচক্ৰ উদ্বোধন কৰে আৰু মুখ্য বক্তা হিচাপে ভাষণ আহবঢ়াই আলিগড় মুছলিম বিশ্ববিদ্যালয়ৰ ৰাজনীতি বিজ্ঞান বিভাগৰ অধ্যাপক আব্দুল ৰহিম বিজাপুৰে। অধ্যাপক বিজাপুৰে তেওঁৰ ভাষণত মানৱ সুৰক্ষা, মানৱ উন্নয়ন, সুশাসন আৰু বহনক্ষম উন্নয়নৰ ১৭ টা লক্ষ্যৰ দৰে গুৰুত্বপূৰ্ণ বিষয়সমূহ ৰখাৰ লগতে ভাৰতৰ উত্তৰ-পূবৰ ৰাজ্যসমূহে সন্মুখীন হোৱা কেইবাটাও প্ৰত্যাহ্বানৰ ওপৰত আলোকপাত কৰে।

উদ্বোধনী অধিৱেশনৰ পিছতেই কাৰিকৰী অধিৱেশনত “উত্তৰ-পূৰ্বাঞ্চলৰ ৰাজ্য আৰু সমাজ” বিষয়ক যোগ কৰা হৈছে য’ত ১৯ খন কাকত উপস্থাপন কৰা হৈছে। প্ৰতিনিধিসকলে নাগালেণ্ডত ৰাজহুৱা প্ৰশাসন, অসমত বিদ্ৰোহ, মেঘালয়ৰ পৰ্যটন উদ্যোগ, গাৰো মেট্ৰিলিনেল সমাজৰ দৰে বিষয়বোৰ অন্বেষণ কৰে। অনুষ্ঠানৰ শেষত গুৱাহাটী বিশ্ববিদ্যালয়ৰ অধ্যাপক শুভ্ৰজিৎ কোঁৱৰে সামৰণি ভাষণ প্ৰদান কৰে। অধিৱেশনৰ সমাপ্তিৰ পিছতেই সকলো পঞ্জীভুক্ত অংশগ্ৰহণকাৰীক প্ৰমাণপত্ৰ বিতৰণ কৰা হয়। ইউএছটিএমৰ পৰ ফাহমিদা চাহিন বৰাই উপস্থিত সকলোকে ধন্যবাদ জ্ঞাপন কৰে।