ডিজিটেল ডেস্কঃ ঋতুস্ৰাৱ স্বাভাৱিক প্ৰক্ৰিয়া৷ মহিলাৰ ঋতুস্ৰাৱক লৈ আজিও অসহজ আমাৰ বহুসংখ্যক লোকেই৷ আজিও দেশৰ বহু নাৰীয়ে বিভিন্ন নিয়মৰ দোহাই দি অৱহেলিত এই সময়খিনিত৷ বিভিন্ন বিজ্ঞাপন, প্ৰচাৰেও সেই মানসিকতাক সলনি কৰিব পৰা নাই৷ এই মানসিকতাক সলনি কৰিবলৈকে এক প্ৰচেষ্টা ৰূপে আয়োজন কৰা হৈছে দেশত পিৰিয়ড ফেষ্টিভেলৰ৷ ইতিমধ্যেই আৰম্ভ হৈছে সেই উৎসৱ৷ কি কি বিশেষ আয়োজন আছে এই উৎসৱত?

কেৱল গাওঁ অঞ্চলতেই নহয়৷ চহৰৰো বহু অঞ্চলত আজিও ঋতুস্ৰাৱক লৈ আছে বহু ভ্ৰান্ত ধাৰণা৷ চেনিটেৰী নেপকিন ব্যৱহাৰক লৈ দেশত আজিও সচেতনতাৰ অভাৱ৷ চেনীটেৰী নেপকিন ক্ৰয় কৰিবলৈ আজিও লাজ কৰে বহু নাৰীয়ে৷ ইয়াৰ সৈতে জড়িত হৈ আছে বহু কুসংস্কাৰো৷ বৰ্তমানো এই বিষয়টোৰ মুক্তভাৱে আলোচনা কৰিবলৈ সমাজৰ বহুসংখ্যক লোকেই নিবিচাৰে৷ বিশ্বৰ বহুকেইখন দেশতেই ঋতুস্ৰাৱক উদযাপন কৰাৰ এটা পৰম্পৰা গঢ়ি তোলা হৈছে৷ ২০১৭ চনৰ পৰা দেশতো এই উৎসৱ আৰম্ভ হৈছে৷ মুছ ফাউণ্ডেছনৰ উদ্যোগত ২১মে ৰ পৰা চলি আছে এই উৎসৱ৷ ২৮ মে’ লৈকে অনুষ্ঠিত হ’ব এই উৎসৱ৷ ২০১৪ চনত পোনপ্ৰথমে দেশত এই অনুষ্ঠান আয়োজন কৰিছিল মুছ ফাউণ্ডেছনে৷ চাৰিখন মহাদেশৰ ভিতৰত ৯খন দেশে এই অনুষ্ঠানৰ আয়োজন কৰি আহিছে৷ এইবাৰো দেশৰ ৭খন ৰাজ্যত এই উৎসৱ চলি আছে৷ চুবুৰীয়া দেশ নেপালতো উদযাপিত হৈছে এই উৎসৱ৷ ইফালে এই উৎসৱ উদযাপনৰ সিদ্ধান্ত লৈছে আফ্ৰিকাইয়ো৷

ঋতুস্ৰাৱ কি? এই সময়খিনিত কেনেকুৱা সতৰ্কতা অৱলম্বন কৰিব? কি কি স্বাস্থ্যবিধি মানি চলাটো প্ৰয়োজন? এই বিষয়সমূহক লৈ সচেতনতা বৃদ্ধি কৰাই এই উৎসৱৰ মূল লক্ষ্য৷ মুছ ফাউণ্ডেছনে
ঋতুস্ৰাৱক কেন্দ্ৰ কৰিয়েই আয়োজন কৰিছে বিভিন্ন ওৱাৰ্কছপৰো৷ ঋতুস্ৰাৱক কেন্দ্ৰ কৰি থকা সমাজৰ ৰক্ষণশীল মনোভাৱক আঁতৰাই দিবলৈকে প্ৰচেষ্টা চলাইছে মুছ ফাউণ্ডেছনে৷ ঋতুস্ৰাৱক কেন্দ্ৰ কৰি থকা সকলো ভুল ধাৰণা আঁতৰাই গ্ৰামাঞ্চলৰ মহিলাক সজাগ কৰোৱাৰো পদক্ষেপ লৈছে এই ফাউণ্ডেছনে৷