ডিজিটেল ডেস্কঃ টকিঅ অলিম্পিকত ভাৰতক  সোণৰ পদক উপহাৰ দিয়া গল্ড মেন নীৰজ চোপ্ৰাৰ আন এক সাফল্য। ১৯ বছৰৰ বিৰতিত বিশ্ব চেম্পিয়নশ্বিপত দেশলৈ ৰূপ কঢ়িয়াই আনি ইতিহাস সৃষ্টি কৰিলে নীৰজ চোপ্ৰাই।  চোপ্ৰাই বিশ্ব এথলীট চেম্পিয়নশ্বিপত ৮৮.১৩ মিটাৰ জেভলিন দলিয়াই ৰূপৰ পদক আজুৰি আনে। উল্লেখ কৰি লাগিব যে,  ১৯ টা  বছৰত বিশ্ব এথলেটিকছ চেম্পিয়নশ্বিপত ভাৰতে এটাও পদক লাভ কৰিবলৈ সক্ষম হোৱা নাছিল। আৰু এই  ১৯ বছৰ অপেক্ষাৰ অন্ত পেলাই নীৰজ চোপ্ৰাই ৰূপৰ পদক বিজয়েৰে দেশবাসীৰ মুখত পুনৰ হাঁহি বিৰিঙাবলৈ সক্ষম হৈছে৷

উল্লেখ্য যে,  নীৰজে তেওঁৰ চতুৰ্থ থ্ৰোত ৰূপৰ পদক নিশ্চিত কৰিছিল। নীৰজ চোপ্ৰাই পুৱা প্ৰথম থ্ৰোটো ফাউল কৰিছিল। দ্বিতীয় আৰু তৃতীয় থ্ৰো ক্ৰমান্বয়ে ৮২.৩৯ মিটাৰ আৰু ৮৬.৩৭ মিটাৰত গৈছিল। চতুৰ্থ থ্ৰোত, ভাৰতীয় জেভলিন তাৰকাগৰাকীয়ে ৰূপৰ পদক নিশ্চিত কৰিবলৈ সক্ষম হয়। তেওঁ  ৮৮.১৩ মিটাৰ দূৰত্বতলৈ  জেভলিন দলিয়াই এই পদক লাভ কৰে।