ডিজিটেল ডেস্কঃ আজি মোহময়ী অভিনেত্ৰী মাধুৰী দীক্ষিতৰ ওপজা দিন। মাধুৰী দীক্ষিতৰ কেৰিয়াৰ ৯০ ৰ দশকৰ শীৰ্ষত আছিল। মানুহবোৰ তেওঁৰ চলচ্চিত্ৰৰ লগতে তেওঁৰ সৌন্দৰ্যৰো চৰ্চা কৰিছিল। অভিনেত্ৰীগৰাকীৰ জীৱনত সম্পদ, খ্যাতি আৰু প্ৰিয়জনৰ কোনো অভাৱ নাছিল।

উল্লেখ কৰা প্ৰয়োজন যে, ৯০ৰ দশকত আৰু একবিংশ শতিকাৰ প্ৰাৰম্ভণিৰ সময়ত মাধুৰী দীক্ষিত আছিল ভাৰতৰ সৰ্বাধিক উপাৰ্জনকাৰী অভিনেত্ৰী। বিখ্যাত ফৰ্বছ-ইণ্ডিয়া আলোচনীয়ে শীৰ্ষৰ এশজন চেলেব্ৰেটিৰ তালিকাত মাধুৰী দীক্ষিতক এতিয়ালৈকে সাতবাৰ স্থান দিছে। ২০০৮ চনত ভাৰত চৰকাৰে এইগৰাকী প্ৰতিভাসম্পন্ন চিত্ৰ-তাৰকাক পদ্মশ্ৰীৰে সন্মানীত কৰিছিল।

মাধুৰী দীক্ষিত ক্ৰিকেটাৰ অজয় জাদেজাৰ প্ৰেমত পৰি সকলো ত্যাগ কৰিবলৈ সাজু আছিল। সংবাদ মাধ্যমৰ বাতৰি অনুসৰি, এটা বিজ্ঞাপনৰ দৃশ্যগ্ৰহণৰ সময়ত মাধুৰী আৰু অজয়ৰ মাজত প্ৰেম গভীৰ হৈ পৰে। তেতিয়া তেওঁলোক দুয়োৰে ৰোমান্টিক ছবিবোৰে শিৰোনাম দখল কৰিছিল। আনকি এইটোও কোৱা হৈছিল যে মাধুৰীয়ে অজয় জাদেজাক পৰিচালকসকলক তেওঁক চলচ্চিত্ৰলৈ অনাৰ পৰামৰ্শ দিছিল। অজয় জাদেজায়ো চলচ্চিত্ৰত সুনাম অৰ্জন কৰিব বিচাৰিছিল।

মাধুৰী আৰু অজয় জাদেজাৰ প্ৰেমকাহিনী বিচৰা ধৰণে শেষ নহ’ল। কেতিয়াবা পৰিয়াল, কেতিয়াবা পৰিস্থিতি তেওঁলোক দুয়োৰে জীৱনত খলনায়ক হৈ পৰে। প্ৰকৃততে, অজয় জাদেজা এটা ৰাজপৰিয়ালৰ, যি মাধুৰী দীক্ষিতৰ সৈতে তেওঁৰ সম্পৰ্কৰ বিৰোধী আছিল। আনহাতে, মাধুৰী দীক্ষিত এটা সাধাৰণ পৰিয়ালৰ। ইয়াৰ মাজতে অজয় জাদেজাৰ কেৰিয়াৰ বিপদত পৰিবলৈ আৰম্ভ কৰিছিল।  আৰু অৱশেষত তেওঁলোকৰ সৰ্ম্পক শেষ হৈছিল।

১৯৮৪ চনত ৰাজশ্ৰী প্ৰডাকছনৰ ছবি ‘অবোধ’ৰ জৰিয়তে মাধুৰী দীক্ষিতে ছবিজগতত পদাৰ্পণ কৰে। তেখেতৰ বিপৰীতে আছিল বঙালী ছবিৰ অভিনেতা তাপস পল। অৱশ্যে ছবিখনে সফলতা লাভ কৰিব নোৱাৰিলে। ১৯৮৬ চনৰ ছবি ‘স্বাতী’, ‘হিফাজত’, ‘মানৱ হত্যা’ আৰু ‘উত্তৰ দক্ষিণ’ত তেখেতে অভিনয় কৰিছিল যদিও এইকেইখন ছবিয়ে বক্স অফিচত বিফল হ’ল। হিফাজত আছিল অনিল কাপুৰৰ লগত মাধুৰী দীক্ষিতৰ প্ৰথমখন ছবি।

১৯৮৮ চনত মুক্তিলাভ কৰা, এন. চন্দ্ৰাৰ দ্বাৰা পৰিচালিত একছন ৰোমাঞ্চ ছবি ‘তেজাব’-এ অভিনেত্ৰীগৰাকীৰ বাবে অপাৰ সফলতা কঢ়িয়াই আনে।ছবিখন সেইবছৰৰ সৰ্বাধিক উপাৰ্জনকাৰী ছবি হিচাপে পৰিগণিত হয় আৰু মাধুৰী দীক্ষিতে ফিল্মফেয়াৰৰ পৰা শ্ৰেষ্ঠ অভিনেত্ৰীৰ প্ৰথমটো মনোনয়ন লাভ কৰে। প্লেনেট বলিউদৰ অক্ষয় শ্বাহে লিখে যে, “যদিও ‘এক দো তিন’ নামৰ গীতটোৰ বাবেহে দৰ্শকে মাধুৰীক মনত ৰাখিছে, কিন্তু ছবিখনত প্ৰদৰ্শন কৰা অভিনয়ো বিশেষভাৱে লক্ষণীয়।”