তেতিয়া ভাৰতীয় ক্ৰিকেট দলে বিশ্বজয় কৰি আহিছে। দেশত বিশ্বজয়ী ভাৰতীয় দলটোৰ প্ৰতিজন সদস্য নায়কলৈ পৰিণত হৈছে। ক্ৰিকেট বলিয়া ভাৰতীয় তেতিয়া বিজয়ৰ উল্লাসত মতলীয়া। কিন্তু একে সময়তে চিন্তিত হৈ পৰিছিল বি চি চি আই। কাৰণ বিশ্বজয়ী ভাৰতীয় দলটোৰ সদস্যসকলক পুৰস্কৃত কৰিবলৈ বি চি চি আইৰ হাতত নাই ধন।

সেই সময়ৰ বি চি চি আইৰ অন্যতম প্ৰশাসক ৰাজ সিং ডুংগৰপুৰে ব’ৰ্ডৰ আন আন সদস্যসকলক এক প্ৰস্তাৱ দিলে। লতা মংগেশকাৰক এটা কনচাৰ্টৰ বাবে অনুৰোধ কৰক। এই প্ৰস্তাৱ বি চি চি আইৰ তেতিয়াৰ সভাপতি এন কে পি চালেভে আৰু ৰাজ সি‌ ডুংগৰপুৰে লতা মংগেশকাৰৰ কাষলৈ লৈ গ’ল। ব’ৰ্ডৰ এই প্ৰস্তাৱ এটা মুহূৰ্ততে মানি ল’লে লতা দিদিয়ে।

ইয়াৰ পিছতেই দিল্লীত লতা মংগেশকাৰে এটা কনচাৰ্টত অংশগ্ৰহণ কৰিলে। এই কনচাৰ্টৰ পৰা ২০ লাখ টকা উপাৰ্জন কৰিলে বি চি চি আইয়ে। ১৯৮৩ চনত ২০ লাখ টকা সৰু সংখ্যা নাছিল। কিন্তু ২০ লাখ টকা উপাৰ্জন কৰাৰ পিছতো সেই কনচাৰ্টৰ বাবে এটা টকাও মাননি হিচাপে গ্ৰহণ নকৰিলে লতা দিদিয়ে। সেই ২০ লাখৰ টকাৰ পৰাই ব’ৰ্ডে বিশ্বজয়ী প্ৰতিজন খেলুৱৈক ১ লাখকৈ টকা পুৰস্কাৰ হিচাপে আগবঢ়ালে।