ডিজিটেল ডেস্কঃ কোকৰাঝাৰত দিনকদিনে বৃদ্ধি পাইছে পশুধন চুৰিৰ ঘটনা৷ জিলাখনৰ বিভিন্ন প্ৰান্তত পশুধন চুৰিৰ ঘটনা সংঘটিত হৈ থকাৰ সময়তে কালি নিশা কোকৰাঝাৰ জিলাৰ উজানপাৰা গাঁৱত তিনিটা চোৰে গোহালিৰ পৰা ম’হ চুৰি কৰি নিয়াৰ প্ৰচেষ্টা চলায়৷ নিশা প্ৰায় চাৰে দহ বজাত উজানপাৰা গাঁৱৰ কেংগুৰ বড়োৰ গোহালিৰ পৰা চোৰে ম’হ চুৰি কৰিবলৈ লওঁতেই হুলস্থুলৰ সৃষ্টি হয় আৰু ৰাইজে ঘেৰি ধৰি চোৰক আটক কৰি উত্তম মাধ্যম সোধাই আৰক্ষীক চমজাই দিয়ে।

উজানপাৰা গাঁৱৰ কেংগুৰ বড়োৰ গোহালিৰ পৰা চোৰে ৰছী কাটি ম’হ চুৰি নিয়াৰ সময়তে গৃহস্থই দেখা পায়। চোৰক দেখি গৃহস্থই চোৰ, চোৰ বুলি চিঞৰ-বাখৰ কৰাত ওচৰ-চুবুৰীয়া অহাত আটক কৰিবলৈ সক্ষম হয় চোৰকেইটাক৷ ৰাইজে চৌদিশৰ পৰাই গাঁৱখন ঘেৰি ধৰি চোৰৰ সন্ধান কৰে আৰু গাঁৱখনৰ পৰা এটা চোৰক আটক কৰিছে। পলাতক আন দুজন চোৰৰ ভিতৰত এটাক পাশ্ববৰ্তী হীৰাপাৰা গাঁৱত আৰু আনটোক ভালুকঝোৰা গাঁৱত গঞা ৰাইজে আটক কৰিবলৈ সক্ষম হয়।

তিনিওটা চোৰকে ৰাইজে উত্তম-মাধ্যম সোধাই গুৰুতৰভাৱে আহত কৰি আৰক্ষীক চমজাই দিয়ে। উল্লেখ্য যে চোৰ তিনিটাক কোকৰাঝাৰ জিলাৰ ঘোৰামাৰাৰ ছালেক আলি, ৰফিকুল শ্বেখ আৰু আনটোক ধুবুৰী জিলাৰ ফকিৰগঞ্জৰ সুৰত জামাল বুলি জানিব পৰা গৈছে৷ সম্প্ৰতি তিনিওটা চোৰে কোকৰাঝাৰ আৰএনবি চিকিৎসালয়ত সংকটজনক অৱস্থাত চিকিৎসাধীন হৈ আছে।