ডিজিটেল ডেস্কঃ জোনমণি ৰাভাৰ মৃত্যুুৰ পাছতে বহু  ন ন তথ্য পোহৰলৈ আহিছে।  কি কাৰনত গভীৰ নিশা জোনমণি ৰাভা জখলাবন্ধাৰ ফালে গৈছিল সেয়াও এতিয়া ৰহস্যজনক এক বিষয় হৈ পৰিছে।  উল্লেখ কৰা প্ৰয়োজন যে, এটা বিশেষ অভিযোগৰ বাবে শলঠেকত পৰা জোনমণি ৰাভা পুনৰ চাকৰিত যোগদান কৰাৰ পাছতে যথেষ্ট সক্ৰিয়তাৰে কেইবাটাও বিশেষ অভিযান চলাইছিল। জোনমণি ৰাভাৰ এই সক্ৰিয়তাৰ কথা শেহতীয়াকৈ স্বীকাৰ কৰিছে এছ পি লীনা দলেও।

কিন্তু জোনমণিৰ এই মৃত্যুৰ পাছতে বহু তথ্য শেহতীয়াকৈ পোহৰলৈ আহিছে। জোনমণিৰ এই ভয়ংকৰ দুৰ্ঘটনা সংঘটিত হোৱাৰ ৰাতিয়েই জোনমণিৰ কাহিলীপাৰাস্থিত ঘৰত চলিছিল আৰক্ষীৰ এক বিশেষ অভিযান। এই অভিযানত আৰক্ষীয়ে নগদ ১লাখ টকা জব্দ কৰিছিল জোনমণি ৰাভাৰ ঘৰৰ পৰা। পোহৰলৈ অহা তথ্য অনুসৰি, লখিমপুৰত জোনমণিৰ বিৰুদ্ধে এটা গোচৰ ৰুজু হৈছিল। এই গোচৰত তেওঁৰ বিৰুদ্ধে অভিযোগ আহিছিল যে, তেওঁ ৬লাখ টকাৰ ঘোচ দাবী কৰিছে। ইয়াৰ কিছু ধন আগধন লোৱাৰ কথাও উল্লেখ কৰা হৈছে এজাহাৰখনত।

কেৱল এয়াই নহয়, শেহতীয়াকৈ এগৰাকী ফেচবুক পোষ্টৰ পৰা বহু কথা পোহৰলৈ আহিছে। নগাঁৱৰ এগৰাকী জ্যেষ্ঠ সাংবাদিকে জোনমণিৰ নাম উল্লেখ নকৰাকৈ ফেচবুকত বহু গুৰুতৰ অভিযোগ উত্থাপন কৰাও দেখা গৈছে। অৱশ্যে সাংবাদিক গৰাকীয়ে উক্ত পোষ্টটোত জোনমণিৰ নাম উল্লেখ কৰা নাই।

কিন্তু সেয়া যি কি নহলেও,  জোনমণি ৰাভাৰ বিৰুদ্ধে পুনৰ উত্থাপন হোৱা এনে গুৰুতৰ অভিযোগে সমগ্ৰ ঘটনাক এক নতুন মূৰ প্ৰদান কৰিছে। তীব্ৰ মানসিক হেচাঁত জোনমণি ৰাভা অকলেই তীব্ৰ গতিত বাহন চলাই নিজে আত্মহত্যাৰ দৰে ঘটনা সংঘটিত কৰিলে বুলিও এচামে সন্দেহ প্ৰকাশ কৰিছে। বহুতে দাবী কৰিছে যে, জোনমণি ৰাভাৰ শেহতীয়াকৈ ড্ৰাগছ আৰু অপৰাধীৰ বিৰুদ্ধে হোৱা সক্ৰিয়তাই কাল হল আৰু এই সক্ৰিয়তাৰ বাবেই দুষ্ট চক্ৰই ষড়যন্ত্ৰ কৰি জোনমণিক এনেদৰে ৰহস্যজনকভাৱে হত্যা কৰিলে।

আৰক্ষীয়ে এই সমগ্ৰ ঘটনাৰ তদন্ত অব্যাহত ৰাখিছে। ইফালে কি গোচৰত জোনমণিৰ ঘৰত গভীৰ নিশা আৰক্ষীয়ে অভিযান চলাইছিল সেয়াও এতিয়া ৰহস্যৰ আৱৰ্তত। ইফালে পৰিয়ালৰ লোকেও জোনমণিক বিভাগীয় কৰ্তৃপক্ষৰ পৰা তীব্ৰ হেচাঁ প্ৰদান কৰা হৈছিল উল্লেখ কৰিছে। সমগ্ৰ বিষয়টোলৈ চাই অচিৰেই জোনমণিৰ ওপৰত আৰক্ষীয়ে এক কঠোৰ ব্যৱস্থা গ্ৰহণৰ দিশে আগবাঢ়িলে হেতেন বুলিয়েই সন্দেহ কৰিব পাৰি। লোকচক্ষুৰ পৰা আঁৰত ইয়াৰ বাবে হয়তো যাৱতীয় সকলো সাজুও কৰা হৈছিল। কিন্তু ইয়াৰ পূৰ্বেই সংঘটিত হল এই অঘটন।

ইফালে ছচিয়েল মিডিয়াত শেহতীয়াকৈ ভাইৰেল হৈছে দুৰ্ঘটনা সংঘটিত হোৱা দিনা নিশা ১২.২১বজালৈকে হোৱাটছ এপত অনলাইন আছিল জোনমণি।  সেই সময়ত জোনমণিৰ হোৱাটছ এপৰ ডি পি আছিল কলা ৰঙৰ।  কি কাৰনত জোনমণিৰ এনে মানসিক অৱস্থাৰ অৱণতি ঘটিছিল সেয়া তদন্ততহে পোহৰলৈ আহিব।