ডিজিটেল ডেস্কঃ  দীৰ্ঘ সময় কৰ্কট ৰোগত আক্ৰান্ত হৈ চেন্নাইত চিকিৎসাধীন অৱস্থাত শনিবাৰে পুৱতি নিশা শেষ নিশ্বাস ত্যাগ কৰে জনপ্ৰিয় যুৱ অভিনেতা কিশোৰ দাসে। কেইবাখনো ধাৰাবাহিক আৰু বোলছবিত অভিনয় কৰি যুৱ প্ৰজন্মৰ মাজত জনপ্ৰিয়তা অৰ্জন কৰা কিশোৰ দাসে অচিনা দেশলৈ মেলানি মগাৰ খবৰে সমগ্ৰ অসমত শোকৰ ছাঁ পেলায়। অসমৰ অভিনয় জগততো শোকৰ ছাঁ পৰে।

বিশিষ্ট কৌতুক অভিনেতা হিৰণ্য ডেকা, প্ৰণৱ দত্ত, পৰিচালক প্ৰণৱ ভড়ালীয়ে অভিনেতাগৰাকীৰ প্ৰতিচ্ছৱিত পুষ্পাঞ্জলি অৰ্পণ কৰি শ্ৰদ্ধাঞ্জলি জ্ঞাপন কৰে। যুৱ অভিনেতাগৰাকীক স্মৰণ কৰি আত্মাৰ সদ্গতি কামনা কৰাৰ লগতে পৰিয়ালক সমবেদনা জ্ঞাপন কৰে কৌতুক অভিনেতা হিৰণ্য ডেকা, প্ৰণৱ দত্ত, পৰিচালক প্ৰণৱ ভড়ালীয়ে।

কিশোৰ দাসৰ মৃত্যু অভিনয় জগতৰ বাবে অপূৰণীয় ক্ষতি বুলি কয় কৌতুক অভিনেতা হিৰণ্য ডেকা, প্ৰণৱ দত্তই। জ্যেষ্ঠ নাগৰিক বিমল মহন্ত, ৰাজেশ কলিতা, মহেন্দ্ৰ গুৰুং, ব্যৱসায়ী লোহিত শৰ্মাৰ উপস্থিতিত গুৱাহাটী মহানগৰীৰ ভেটাপাৰাৰ ঘোঁৰামৰা চ’কত অনুষ্ঠিত শ্ৰদ্ধাঞ্জলি অনুষ্ঠানত বন্তি প্ৰজ্বলন কৰি অভিনেতাগৰাকীক শ্ৰদ্ধাঞ্জলি জ্ঞাপন কৰা হয়।