কোকৰাঝাৰঃ কোকৰাঝাৰ জিলা পৰিবহণ বিষয়াৰ নেতৃত্বত আজি গোসাঁইগাঁও সদৰ চহৰত চলাচল কৰা ই -ৰিক্সাৰ বিৰুদ্ধে অভিযান চলোৱা হয়। ই- ৰিক্সাৰ পঞ্জীয়ন নম্বৰ, বীমা আৰু চালকৰ লাইচেন্স বিচাৰি উক্ত অভিযান চলাই প্ৰায় ৭০ খন ই- ৰিক্সা জব্দ কৰে। ই- ৰিক্সাৰ চালকসকলে পৰিবহণ আইন ভংগ কৰা বুলি ই-ৰিক্সা সমূহক আটক কৰে আৰু নথি-পত্ৰ বিহীন ই-ৰিক্সাসমূহ আটক কৰি গোসাঁইগাঁও থানাত আনি আৱদ্ধ কৰে।

পৰিবহণ আইন নমনা ই-ৰিক্সাসমূহ থানাৰ পৰা ১০,০০০ টকা জৰিমনা আদায় দি লৈ যাব লাগিব বুলি জিলা পৰিবহণ বিষয়া সৰ্বেশ্বৰ ব্ৰহ্মই নিৰ্দেশ দিয়াত ই- ৰিক্সা চালকসকলৰ মাজত হাহাকাৰ লাগে। পৰিবহণ বিভাগৰ এই নিৰ্দেশ শুনাৰ পাছত গোসাঁইগাঁও ২ নম্বৰ ৱাৰ্ডৰ বাসিন্দা তথা ই-ৰিক্সা চলাই জীৱিকা নিৰ্বাহ কৰা গোপাল ৰায় (৫০) হৃদৰোগত আক্ৰান্ত হৈ থানাৰ সন্মুখতে ঢলি পৰে। তৎক্ষণাত লোকজনক হাব্ৰুবিলস্থিত আৰএনবি অসামৰিক চিকিৎসালয়লৈ নিয়া হয় যদিও চিকিৎসকে তেওঁক মৃত বুলি ঘোষণা কৰে।

ইয়াৰ পাছতে ই- ৰিক্সা চালকসকল ক্ষোভত ফাটি পৰে। তেওঁলোকে মৃতদেহ লৈ গোসাঁইগাঁও থানাৰ সন্মুখত বিক্ষোভ প্ৰদৰ্শন কৰি ডি টি অ’ মুৰ্দাবাদ, ডি টি অ’ৰ দাদাগিৰী নচলিব, মৃত চালকজনৰ মৃত্যুৰ বাবে দায়ী ডি টি অ’ক গ্ৰেপ্তাৰ কৰক, মৃতকৰ পৰিয়ালক দহ লাখ টকা ক্ষতিপূৰণ দিয়ক আদি শ্লোগানেৰে পৰিৱেশ উত্তাল কৰি তোলে।

থানাৰ সন্মুখত উত্তাল প্ৰতিবাদী কাৰ্যসূচী চলাকালিন সময়ছোৱাতে কাৰ্যবাহী দণ্ডাধীশ সহ পৰিবহণ বিষয়া আহি উপস্হিত হোৱাৰ পাছত ক্ষোভৰ মাত্ৰা অধিক বৃদ্ধি পায় যদিও গোসাঁইগাঁও আৰক্ষীয়ে পৰিস্থিতি নিয়ন্ত্ৰণ কৰিবলৈ সক্ষম হয়। পিছত আৰক্ষী, পৰিবহণ বিষয়া আৰু ই- ৰিক্সা ইউনিয়নৰ নেতৃবৃন্দৰ মাজত সমস্যা সমাধানৰ বাবে এক বৈঠক অনুষ্ঠিত হয়। বৰ্তমানেও পৰিস্থিতি উত্তেজনাপূৰ্ণ হৈ আছে আৰু পৰিবহণ বিভাগৰ বিৰুদ্ধে চালকসকল ক্ষোভত ফাটি পৰিছে।