ডিজিটেল ডেস্কঃ পৃথিৱী বহু আগবাঢ়ি গল কিন্তু মানৱতা যেন এতিয়া ক্ৰমান্বয়ে হেৰাই গৈছে। ভোগবাদী পৃথিৱীখনত সকলো কেৱল নিজক লৈ ব্যস্ত। মানৱতা যেন আজি সমাজত মূল্যহীন, ভূলুন্ঠিত। ধেমাজিত শেহতীয়াকৈ সংঘটিত হোৱা ঘটনাৰ পৰা এই কথাবোৰে সকলোৰে মনলৈ আহিছে। শেহতীয়াকৈ ধেমাজিত মৃত নৱজাতকক ৫০০ টকাত কিনি খালত দলিয়ালে দুবৃৰ্ত্তই। আমি লাভ কৰা খবৰ অনুসৰি ধেমাজি অসামৰিক চিকিৎসালয়ৰ দাঁতিকাষৰৰ লাচিত নগৰত এটা খালত আন্ধাৰৰ সুযোগ লৈ ৰাতিয়েই মৃত নৱজাতকৰ অভিভাৱকৰ পৰা ৫০০ টকা লৈ দুই দুবৃৰ্ত্তৰূপী ব্যক্তিয়ে নৱজাতকক বস্তাত বান্ধি খালত দলিয়াই থৈ যায় ৷

শনিবাৰে নিশা প্ৰায় ৮ বজাত এই ঘটনা সংঘটিত কৰা সময়তে স্থানীয় বহু কেইজন লোকে ঘটনাটো প্ৰত্যক্ষ কৰি এই কাম সংঘটিত কৰা দুজন যুৱকক আটক কৰে। আৰক্ষীক চমজাই দিয়া যুৱক দুজনে স্বীকাৰ কৰিছে যে, টকা পইচা লৈ অসামৰিক চিকিৎসালয়ত দীৰ্ঘদিন ধৰি মৃত নৱজাতকক এনেদৰে বিভিন্ন স্থানত পেলাই অহাৰ কথা।

এই ভয়ংকৰ ঘটনা পোহৰলৈ অহাৰ পাছতে সমগ্ৰ ধেমাজি চহৰত তীব্ৰ প্ৰতিক্ৰিয়াৰ সৃষ্টি হৈছে।