ডিজিটেল ডেস্কঃ এটা সময় আছিল যিটো সময়ত ইলেক্ট্ৰনিক সাংবাদিকতা মানুহেই বুজিয়েই পোৱা নাছিল। সেই সময়তে ধুমকেতুৰ দৰে এই জগতখনত প্ৰৱেশ কৰিছিল এগৰাকী লোকে। ইয়াৰ পিছতে প্ৰায় তিনিটা দশক এই জগতখনত ধ্ৰুৱতৰাৰ দৰে জিলিকি আছিল তেওঁ। কথনশৈলী আৰু বাতৰিৰ প্ৰকাশভংগীৰ বাবে সাংবাদিকতাৰ জগতখনত এখন সুকীয়া আসন দখল কৰা সেই মানুহগৰাকীয়েই আছিল বিনোদ দুৱা। শনিবাৰে এই বিশিষ্ট সাংবাদিকগৰাকীয়ে অসংখ্য গুণমুগ্ধক শোকসাগৰত পেলাই সামৰণি মাৰিলে জীৱন নাটৰ।

দূৰদৰ্শনত যেতিয়া তেওঁ নিৰ্বাচনী সমীক্ষা বা আলোচনা কৰিছিল তাক চাবলৈ ৰৈ আছিল লাখ লাখ দৰ্শক। নিজৰ এক সুকীয়া ব্যক্তিত্ব থকা বিনোদ দুৱাই ৰাজনীতিবিদক যেতিয়া প্ৰশ্ন কৰিছিল, সেই প্ৰশ্নত থৰকাছুতি হেৰুৱাইছিল বহুজনে। বহুতে এইবুলিও কব খোজে সেই সময়ত ৰাজনীতিবিদক সমালোচনা কৰাৰ ক্ষেত্ৰত বিনোদ দুৱাই যি দুঃসাহস দেখুৱাইছিল, তেনে সাহস কোনো সাংবাদিকৰ নাছিল।

৬৭বছৰ বয়সত মৃত্যু হোৱা সাংবাদিকগৰাকীৰ মৃত্যুৰ সময়ত বয়স আছিল ৬৭বছৰ। অহা দেওবাৰে লোধী শ্মশানত তেওঁৰ অন্ত্যেষ্টিক্ৰিয়া সম্পন্ন কৰা হ’ব বুলি পৰিয়ালৰ লোকে জানিবলৈ দিছে। উল্লেখ্য যে, অসুস্থ হোৱাৰ পাছত দুৱাক দিল্লীৰ এখন হাস্পতালত ভৰ্তি কৰা হৈছিল। চলিত বৰ্ষৰ প্রথম ভাগতে তেওঁ কৰোনাতো আক্ৰান্ত হৈছিল। দুৱাৰ মৃত্যুৰ খবৰ বিয়পি পৰাৰ লগে লগে এতিয়া দেশৰ সংবাদমাধ্যমত শোকৰ ছাঁ পৰিছে।

দেশৰ সাংবাদিকতাৰ ইতিহাসত যদি সাহসী সাংবাদিকৰ নামৰ এখন তালিকা প্ৰস্তুত কৰা হয়, সেই তালিকাত বিনোদ দুৱাৰ নাম প্ৰায় প্ৰথমতেই থাকিব। কোনোদিন ৰাজনৈতিক হেচাঁ নিজৰ সাংবাদিকতাৰ ধাৰা সলনি নকৰা এইগৰাকী সাংবাদিকৰ ইংৰাজী আৰু হিন্দীভাষাত আছিল অগাধ দখল। তেখেতৰ সাংবাদিকতা আহি থকা প্ৰজন্মই সদায় মনত ৰাখিব যে, দেশত এনে এগৰাকী সাংবাদিকো আছিল, যি ৮০-৯০দশকত কঁপাই আছিল সমগ্ৰ দেশ।