ডিজিটেল ডেস্কঃ আনুষ্ঠানিক শিক্ষাৰ প্ৰয়োজন আছে। কিন্তু আনুষ্ঠানিক শিক্ষাৰ মাৰ্কশ্বিট খনেই সকলো নহয়। তেনে বহু উদাহৰণ আছে। তেনে এগৰাকী লোক হৈছে অক্ষয় কুমাৰ। বলিউদৰ আগশাৰীৰ ৫ অভিনেতাৰ ভিতৰত সকলোৱে নাম লব অক্ষয় কুমাৰৰ। অভিনয়ৰ সমান্তৰালভাৱে সমাজসেৱাৰ ক্ষেত্ৰতো অক্ষয়ৰ নাম আছে। অলপতে যোৱা বছৰ কোন চেলিব্ৰেটিৰ কিমান আয় হ’ল তাৰ এখন তালিকা উলিয়াইছে Forbes মেগাজিনে ৷ এই তালিকাত বিশ্বৰ ১০০ জন চেলিব্ৰিটিৰ কথা উল্লেখ আছে ৷

ভাৰতৰ অক্ষয় কুমাৰৰ নাম এই তালিকাত অন্তৰ্ভুক্ত হৈছে৷ তালিকাত অক্ষয় কুমাৰৰ স্থান ৫২ নম্বৰত ৷ Forbesৰ মতে অক্ষয় কুমাৰৰ যোৱা বছৰৰ আয় ৪৮.৫ মিলিয়ন ডলাৰ ৷ ১ ডলাৰত যদি ৭৭.৬ টকা ধৰা হয় তেন্তে যোৱা বছৰত তেওঁৰ মুঠ আয় প্ৰায় ৩৬৭ কোটি টকা৷  ইয়াৰে কেইবাকোটি টকা সমাজসেৱাৰ বাবে দান কৰিছে অক্ষয়ে।

এক বিশাল ব্যক্তিত্বৰ গৰাকী অক্ষয় কুমাৰ স্কুলীয়া জীৱনত এটা গুৰুত্বপূৰ্ণ পৰীক্ষাত ফেইল কৰিছিল। মাৰ্কশ্বিট পিতৃ-মাতৃক নেদেখুৱাকৈ বহুদিন লুকুৱাই ৰাখিছিল অক্ষয়ে। এই কথা টুইটাৰত নিজেই প্ৰকাশ কৰিছে অক্ষয় কুমাৰে। এসময়ত স্কুলৰ পৰীক্ষাত ফেইল কৰা লৰাটো এতিয়া অভিনয় জগতৰ ধ্ৰুৱ তৰা। টুইটাৰত এই ঘটনা উল্লেখ কৰি অক্ষয়ে লিখিছে, বিফল হৈছো বহুবাৰ বহুক্ষেত্ৰত, কিন্তু সপোনৰ পিছ এৰা নাছিলো।

তেনে আন এগৰাকী অভিনেতা হৈছে বীৰ দাস। বলিউদৰ এখন জনপ্ৰিয় মুখ বীৰাদাস। বহুকেইখন ছবিৰ লগতে ৱেব চিৰিজত অভিনয় পাৰদৰ্শিতা প্ৰদৰ্শন কৰিবলৈ সক্ষম হোৱা বীৰদাস ছাত্ৰ অৱস্থাত বৰ্ডৰ সকলো পৰীক্ষাত অতি কম নম্বৰ পাইছিল। মাৰ্কশ্বিট সেইসময়ত আনক দেখাবলৈ লাজ পোৱা বীৰদাস এতিয়া এগৰাকী সফল অভিনেতা।

কমেডি অভিনেতা হিচাপে সকলোৱে আদৰি লোৱা বীৰদাসে এতিয়াও কয় যে, তেওঁৰ পঢ়া-শুনা আছিল অতি বেয়া। কিন্তু তেওঁ সদায়ে এই কথালৈ লক্ষ্য কৰিছিল যে, তেওঁৰ কৰিব পৰা কি কাম আছে, যিকাম আনে কৰিব নোৱাৰে। এনেকৈয়ে আজি মায়ানগৰীৰ মুম্বাইৰ এটা চিনাকী নাম হৈ পৰিছে বীৰদাস।