আধুনিক ভাৰতৰ স্বপ্নদ্ৰষ্টা আৰু স্বদেশপ্ৰেমৰ মূৰ্ত প্ৰতীক, ভাৰতৰত্ন, প্ৰাক্তন প্ৰধানমন্ত্ৰী অটলবিহাৰী বাজপেয়ীৰ আজি পূণ্য তিথি৷ সমগ্ৰ দেশে অভিনৱ ব্যক্তিত্বৰ অধিকাৰী প্ৰয়াত প্ৰধানমন্ত্ৰী অটলবিহাৰী বাজপেয়ীৰ পূণ্য তিথি উপলক্ষে দেশৰ ভিন্ন প্ৰান্তত প্ৰাক্তন প্ৰধামমন্ত্ৰী অটল বিহাৰী বাজপেয়ীৰ স্মৃতি সভাৰ লগতে সোৱৰণ কৰিছে প্ৰাক্তন প্ৰধানমন্ত্ৰীগৰাকীৰ বৰ্ণিল জীৱনক৷ ভাৰত ৰত্ন অটল বিহাৰী বাজপেয়ী যদিও কায়িক ভাৱে আমাৰ মাজত নাই তথাপিতো কোটি কোটি ভাৰতীয়ৰ হৃদয়ত আজিও অটল বিহাৰী বাজপেয়ীৰ প্ৰতিটো কৰ্মৰাজী বৰ সজীৱ হৈ আছে৷ এটা ঘটনা বহুল জীৱনৰ অধিকাৰী প্ৰয়াত অটল বিহাৰী বাজপেয়ীয়ে নিজৰ জীৱনকালত এনে কিছুমান ঘটনাৰ সাক্ষী হৈছে যি বোৰ ঘটনাই আজিও দেশবাসী আৰু নৱপ্ৰজন্মক অনুপ্ৰেৰণা দিয়ে৷ জানিলে আচৰিত হ’ব ভাৰত ৰত্ন অটল বিহাৰী বাজপেয়ীয়ে ফটা কুৰ্ত্তা পৰিধান কৰি ভাষণ দিছিল৷ এই ঘটনা ১৯৫৩ চনৰ৷ মুম্বাইত জনসংঘৰ এখন সভা সম্বোধন কৰাৰ দায়িত্ব পৰিল অটল বিহাৰী বাজপেয়ীৰ কান্ধত৷ সেই সময়ত অটল বিহাৰী বাজপেয়ীৰ লগত কুৰ্ত্তা আছিল মাত্ৰ দুটা আৰু এই দুটা কুৰ্ত্তাই অতিমাত্ৰা ব্যৱহাৰৰ ফলত ফাটি গৈছিল৷ কিন্তু অটল বিহাৰী বাজপেয়ীয়ে মঞ্চত ফটা কুৰ্ত্তাৰ ওপৰত লজ্জা নিবাৰণৰ বাবে এটা জেকেট পৰিধান কৰি দায়িত্ব পালন কৰিছিল৷ এয়াই আছিল প্ৰাক্তন প্ৰধানমন্ত্ৰী অটল বিহাৰী বাজপেয়ী৷ যিয়ে পিন্ধন, উৰণ, সাজ-সজ্জাক লৈ আগ্ৰহী নাছিল কিন্তু আগ্ৰহী আছিল দেশৰ উত্তৰণৰ বাবে৷