গোলকগঞ্জৰ অন্তৰ্গত ছাগলীয়াত সংঘটিত হৈছে এক লজ্জাজনক ঘটনা। ধুবুৰীৰ সংবাদদাতা অমিতাভ কৰ্মকাৰে প্ৰেৰণ কৰা বাতৰি অনুসৰি ছাগলীয়াৰ দ্বিতীয়খণ্ড গাঁৱৰ খলিল সেখৰ পুত্ৰ জাহাংগীৰ আলমে ৰেছমা নামৰ এগৰাকী কিন্নৰৰ পৰা বিয়াৰ প্ৰতিশ্ৰুতি দি লুটিলে লক্ষাধিক টকা৷ এই অভিযোগ উত্থাপন কৰিছে খোদ কিন্নৰ ৰেছমাই৷ সংবাদমাধ্যমৰ সম্মুখত কিন্নৰ ৰেছমাই দিয়া ভাষ্য অনুসৰি, জাহাংগীৰ আলমে ৰেছমা নামৰ কিন্নৰগৰাকীক প্ৰথমে প্ৰেমৰ জালত বন্দী কৰে৷ তাৰপিচতেই কিন্নৰগৰাকীক বিয়াৰ প্ৰতিশ্ৰুতি দি কিন্নৰ ৰেছমাৰ পৰা লক্ষাধিক টকা আত্মসাৎ কৰে৷ পৰৱৰ্তী সময়ত কিন্নৰগৰাকীয়ে যেতিয়া জাহাংগীৰক বিয়াৰ বাবে জোৰ কৰে, তেতিয়াই জাহাংগীৰে কিন্নৰ ৰেছমাৰ সৈতে যোগাযোগ বন্ধ কৰে৷ কিন্নৰ ৰেছমাই জাহাংগীৰক বিচাৰি জাহাংগীৰৰ ঘৰলৈ যাওতে জাহাংগীৰৰ পৰিয়ালবৰ্গই কিন্নৰ ৰেছমাক মাৰধৰ কৰাৰ লগতে প্ৰাণে মৰাৰ ভাবুকি প্ৰদান কৰে৷ উপায়ন্তৰ ৰেছমাই ন্যায় বিচাৰি বৰ্তমান দ্বাৰস্থ হৈছে ছাগলীয়া আৰক্ষী চকীৰ৷