সকলোৰে জীৱনত মাতৃৰ গুৰুত্ব অতুলনীয়। আমাক জীৱন দিয়া মাতৃয়ে আমাক গোটেই জীৱন মৰম আৰু শিক্ষা দিয়ে, আমাৰ প্ৰতিটো সময়ত লগ দিয়ে, সাহস হৈ থিয় দিয়ে৷ সমগ্ৰ বিশ্বতে মে’ মাহৰ দ্বিতীয়টো দেওবাৰে পালন কৰা হয় মাতৃ দিৱস। প্ৰতিগৰাকী মাতৃৰ বাবে এই দিনটো বিশেষ কৰি তুলে প্ৰতিগৰাকী সন্তানে৷ কিন্তু মাতৃৰ বাবে এটা বিশেষ দিনৰ জানো প্ৰয়োজন আছে? কাৰণ প্ৰতিগৰাকী সন্তানৰ বাবে নিজৰ মাতৃগৰাকী সদায় বিশেষ, তেওঁৰ নামত প্ৰতিটো দিনেই বিশেষ৷ মাতৃ দিৱস হৈছে মাতৃৰ প্ৰতি সন্মান প্ৰদৰ্শন কৰি উদযাপন কৰা এক দিৱস৷ ইয়াৰ দ্বাৰা মাতৃ, মাতৃত্ব, সমাজলৈ মাতৃৰ সম্পৰ্কক সোৱঁৰা হয়৷ পৃথিৱীৰ বিভিন্ন দেশসমূহে বিভিন্ন সময়ত এই দিৱস উদযাপন কৰা দেখা যায়৷ বিশেষকৈ মাৰ্চ আৰু মে’ মাহত এই দিৱস পালন কৰা হয়৷ বিশ্বৰ বিভিন্ন প্ৰান্তত যেনে- উত্তৰ গোলাৰ্ধত এপ্ৰিল-মে’ত এই দিৱস পালন কৰা হয়৷