এটা দুৰ্ঘটনাই প্ৰাণকাঢ়ি নিলে এটা সুখী পৰিয়ালৰ
- Update Time : Sunday, March 10, 2024
এক শোকাৱহ দুৰ্ঘটনাই জোকাৰি গৈছে ৰাজস্থানৰ নাগৌৰ জিলা। নাগৌৰ জিলাত সংঘটিত শোকাৱহ পথ দুৰ্ঘটনাত এটা পৰিয়ালৰ চাৰিজন সদস্যৰ মৃত্যু হয়। এখন দ্ৰুতবেগী SUV গাড়ীৰ খুন্দাত প্ৰাণহানি ৪গৰাকীকৈ লোকৰ। মৃতকৰ ভিতৰত এগৰাকী গৰ্ভৱতী মহিলাও আছে। পিতৃ-মাতৃ, পুত্ৰ আৰু ভাই বোৱাৰীৰ কৰুণ মৃত্যু।
দেওবাৰে পুৱা সংঘটিত হয় এই ভয়ংকৰ পথ দুৰ্ঘটনাটো। পথৰ কাষত ৰৈ থকা অৱস্থাতে পৰিয়ালৰ আটাইকেইগৰাকী সদস্যক মহতিয়াই লৈ যায় SUV বাহনখনে, যাৰবাবে ঘটনাস্থলীতে থিতাতে নিহত হয় চাৰিওগৰাকী সদস্য। নিহত পৰিয়ালটিৰ ভিতৰত এগৰাকী ৮ মহীয়া গৰ্ভৱতী মহিলাও আছিল।
নিহত আঠমহীয়া গৰ্ভৱতী মহিলাগৰাকীৰ নাম সুমন, তেওঁৰ স্বামী চোটা ৰাম, পুত্ৰ ৰোহিত আৰু ভাইবোৱাৰী ৰেখা। নিহত আটাইকেইগৰাকী লোকৰে মৰণোত্তৰ পৰীক্ষা সম্পন্ন কৰি মৃতদেহ গতাই দিয়ে পৰিয়ালবৰ্গক। একে ঘৰৰে ৪ গৰাকী লোকৰ মৃত্যুৱে গাওঁবাসীক শোকস্তব্ধ কৰি তুলিছে। ইতিমধ্যেই দুৰ্ঘটনাটো সন্দৰ্ভত নিহত পৰিয়ালটোৰ আত্মীয়ই ৰুজু কৰিছে গোচৰ।
