ডিজিটেল ডেস্কঃ অসমবাসীয়ে অধীৰ আগ্ৰহেৰে বাট চাই আছিল। ২৬মাৰ্চ, দেওবাৰৰ দিনটোত পুৱাৰে পৰা সকলোৰে মনত আছিল উতকন্ঠা। দুগৰাকীকৈ অসম কন্যাই আজি ফাইনেল খেলিলে আৰু ফাইনেলত জিকিলেও। আজিৰ দিনটো সচাকৈয়ে আছিল অসমৰ দিন। এটা সাধাৰণ দেওবাৰো দুগৰাকী অসম কন্যাৰ বাবে হৈ পৰিল ঐতিহাসিক দেওবাৰ।

দেওবাৰৰ দিনটোত প্ৰথমে আহিল লাভলীনাৰ খবৰ। বিশ্ব মহিলা বক্সিং চেম্পিয়নশ্বিপত লাভলীনাৰ স্বৰ্ণ জয়।  ৭৫ কেজি শাখাত স্বৰ্ণ জয় লাভলীনা বৰগোহাঁইৰ। লাভলীনাৰ হাতত ফাইনেলত পৰাস্ত অষ্ট্রেলিয়াৰ প্রতিদ্বন্দ্বী। কেটলিন পাৰ্কাৰক হৰুৱাই স্বৰ্ণ জয় লাভলীনাৰ। অসমৰ প্রথমগৰাকী বক্সাৰ হিচাপে স্বৰ্ণ জয় লাভলীনাৰ। পূৰ্বতে লাভলীনাই দুবাৰকৈ জয় কৰিছিল ব্রঞ্জৰ পদক আৰু এইবাৰ লাভলীনা উপনীত হল  চূড়ান্ত লক্ষ্যত।

ইতিহাস ৰচি লাভলীনাৰ আনন্দবোৰ ভাগ-বতৰোৱা কৰি থাকোতেই আহিল ইটো ভাল খবৰ।  প্ৰথমবাৰলৈ অনুষ্ঠিত হোৱা মহিলা আই পি এলত মুম্বাই ইণ্ডিয়ানছৰ জয়।  সুখৰ কথাটো হল এই দলটোতে আছিল অসম কন্যা জিন্টিমণি কলিতা। মঙলদৈৰ জিন্টিমণিয়ে এই খেলখনত যথেষ্ট কষ্ট কৰাৰ লগতে তেওঁৰ কষ্টক লৈ বহুবাৰ চৰ্চিতও হৈছে। জিন্টিমণিৰ বাবেও আজিৰ দিনটো আছিল এটা বিশেষ দিন। অসমবাসীৰ প্ৰাৰ্থনাৰ শেষত জিন্টিমণিয়েও পালে সফলতা।

এনেকৈয়ে দেওবাৰ দিনটো সকলোৰে বাবে হৈ পৰিল এটা ঐতিহাসিক দেওবাৰ। দেওবাৰৰ এই আনন্দ অসমবাসীয়ে হয়তো কাৰো সৈতে ভাগ নকৰিব, কিয়নো এই আনন্দ সুকীয়া…