ডিজিটেল ডেস্কঃ  অভিনেত্ৰী পৰিণিতি চোপ্ৰাৰ সৈতে আপৰ যুৱ সাংসদ ৰাঘৱ চদ্দাক প্ৰত্যক্ষ কৰাৰ পাছতে বহুতৰে মনত কৌতূহল জাগিছে যে এই দুয়োগৰাকীৰ মাজত কি সম্পৰ্ক আছে। ৰাষ্ট্ৰীয় তথা স্থানীয় সংবাদমাধ্যমেও এই খবৰটোক লৈ ব্যস্ত থকা দেখা গৈছে। এখন বিলাসী হোটেলৰ পৰা খাদ্য গ্ৰহণ কৰি ওলাই আহোতেই দুয়োকে একেলগে প্ৰত্যক্ষ কৰিছিল সংবাদমাধ্যমে।

আচলতে দুয়োৰে মাজত কি সম্পৰ্ক আছে! তাক লৈ এতিয়াও দুয়োগৰাকীয়ে কোনো মন্তব্য প্ৰকাশ কৰা নাই যদিও তেওঁলোকৰ অতি ঘনিষ্ঠ মহলে সদৰি  কৰিছে তেওঁলোকৰ মাজত থকা সম্পৰ্কৰ কথা।  কেৱল মুম্বাইতে নহয়, সংবাদমাধ্যমে নেদেখাৰ আগত পূৰ্বেও বহু ঠাইত এনেদৰে একেলগে খাদ্য গ্ৰহণ কৰিছে ৰাঘৱ আৰু পৰিণিতিয়ে।

ইয়াৰ পূৰ্বেও লণ্ডনত ৰাঘৱ-পৰিণিতিয়ে একেলগে খাদ্য গ্ৰহণ কৰাৰ লগতে কেইবাটাও অনু্ষ্ঠানলৈও একেলগে গৈছে। ঘনিষ্ঠ সূত্ৰই সদৰি কৰিছে এই কথা। তেওঁলোকে সদৰি কৰা অনুসৰি, দুয়োৰে মাজত কোনো প্ৰেমৰ সম্পৰ্ক এতিয়ালৈকে নাই। দুয়ো আজিৰ নহয়, বহুদিনৰে পৰাই অতি ভাল বন্ধু।  ৰাজনীতিলৈ অহাৰ পূৰ্বৰে পৰাই ৰাঘৱ চদ্দাই পৰিণিতিৰ সৈতে ভাল সম্পৰ্কত থকাৰ কথা সদৰি কৰিছে ঘনিষ্ঠ মহলে।

অভিনেত্ৰী পৰিণিতি চোপ্ৰাৰ সৈতে আপৰ যুৱ সাংসদ ৰাঘৱ চদ্দাৰ সম্পৰ্ক লৈ শেহতীয়াকৈ ইণ্ডিয়া টুডেও এক বাতৰি প্ৰকাশ কৰিছে। যি বাতৰিত তেওঁলোকৰ মাজত কেৱল বন্ধুত্বৰ সম্পৰ্ক আছে বুলি সদৰি কৰিছে।