ডিজিটেল ডেস্কঃ যোৱা ১২মাৰ্চত গুৱাহাটীত অনুষ্ঠিত হৈ যায় অসম বিধানসভাৰ বিধায়কসকলৰ এখনি ক্ৰিকেট মেচ। শাসক-বিৰোধীৰ বিধায়কসকলে দুটা ভাগত ভাগ হৈ এই খেলখনিত অংশ লয়। মন্ত্ৰী পীয়ুষ হাজৰিকা, বিধায়ক দিগন্ত কলিতাৰ পৰা আৰম্ভ কৰি কংগ্ৰেছী বিধায়ক জাকিৰ হুচেইন চিকদাৰৰ লৈকে প্ৰায় সকলো বিধায়কে এই মেচখনিত উপস্থিত থাকে। কিন্তু এই খেলখনত উপস্থিত নাথাকিল ৰাইজৰ দলৰ বিধায়ক অখিল গগৈ। তাকে লৈ কেইবাজনো বিধায়কে কটাক্ষ কৰিলে অখিল গগৈক।

অখিল গগৈক খেলখনত উপস্থিত নথকাৰ বাবে কটাক্ষ কৰিলে বিধায়ক ৰূপজ্যোতি কূৰ্মীয়ে। কূৰ্মীয়ে কয়- অখিল গগৈ মেচখনলৈ নহাৰ দুটা কাৰন আছে। এটা হৈছে তেওঁ জোতা পিন্ধিব নাজানে আৰু দুই নম্বৰটো হৈছে তেওঁ ক্ৰিকেটেই নহয়, একো খেলেই ভালকৈ খেলিব নাজানে। সেয়েহে লাজত পৰাৰ ভয়ত তেওঁ খেলপথাৰলৈ নাহিল। ইফালে মন্ত্ৰী পীষুষ হাজৰিকাইও অখিল গগৈ খেল খনলৈ অহা হলে ভাল লাগিলহেতেন বুলি মন্তব্য কৰাৰ লগতে ক্ৰীড়াৰ সৈতে ৰাজনীতি নাথাকে বুলি মন্তব্য কৰে।

এতিয়া কি কাৰনত অখিল গগৈ উক্ত মেচখনত উপস্থিত থাকিব নোৱাৰিলে তাক লৈ কোনো মন্তব্য প্ৰকাশ কৰা নাই বিধায়কগৰাকীয়ে।