ডিজিটেল ডেস্কঃ প্ৰায় ২০০৩চনৰ পৰা আৰম্ভ হোৱা এটা সম্পৰ্ক। এটা দশকৰো অধিক কাল এই প্ৰেম নামৰ এই সম্পৰ্কৰ বান্ধোন ডাল সজীৱ হৈ আছিল। তাৰ পাছত ২০১২-১৩ত হঠাতে কিছু কাৰনৰ বাবে এই সম্পৰ্কটোৰ ইতি পৰিছিল। এই সম্পৰ্কটোৱেই আছিল ডেমফুল আৰু জানমণিৰ সম্পৰ্ক। ইয়াৰ পিছতে ২০১৫ৰ পৰা ২০২২ৰ লৈকে কোনো যোগাযোগ, কথা-বতৰা দুয়োৰে মাজত নাছিল। আৰু সুদীৰ্ঘ ৭বছৰৰ মূৰত তেওঁলোকৰ হ’ল আকৌ দেখা। সেই দেখা হ’ল তাকো টিভি ষ্টুডিঅত।

৭বছৰৰ মূৰত তেওঁলোকৰ প্ৰেম, সংঘাত, সংগ্ৰামৰ যাত্ৰা সকলোৱে শুনিলে। দুয়োয়েই যিমানলৈকে পাৰি সিমানৰ লৈকে মনৰ ভাৱ ব্যক্ত কৰিলে। একেলগে থকা সময়ৰ কথা, বিচ্ছেদৰ পিছৰ সময়চোৱাৰ কথা বুকুত যেন এটা শিল থৈ কৈ গ’ল দুয়ো। দুয়োগৰাকীয়েই কলে- অতীতক লৈ কোনো আক্ষেপ নাই, নাই শত্ৰুতাৰ মনোভাৱো।

কথাৰ মাজতে ডেমফুল খ্যাত নয়ন নিলীমে কলে- প্ৰেমত অভিমান ভাল, কিন্তু জেদ বেয়া। অভিমান যেতিয়া ৩দিনতকৈ বেছি দিন থাকিব তেতিয়াই দুয়োপক্ষৰ মাজত সৃষ্টি হয় জেদৰ। ঠিক তেনেদৰে শ্যামন্তিকাইও কলে- জীৱন এজন সচাঁ মানুহক লগ পাইছিলো। যাৰ অন্তৰ বহুত চাফা। কিন্তু তামাম জেদী আৰু খঙাল আছিল নয়ন দা।

২০০২চনৰ ৰংমন নামৰ এখন চিনেমাৰ শ্বুটিঙত প্ৰথম দেখা পাইছিল নয়ন নিলীমে শ্যামন্তিকাক। তাৰ পিছৰে পৰাই আৰম্ভ হৈছিল প্ৰেমৰ যাত্ৰা। দুয়ো দুয়োৰে সংগী হৈ ছবিজগতত দখল কৰিছিল এখন সুকীয়া আসন। কিন্তু সময়ৰ পাকচক্ৰত দুয়োৰে মাজৰ সম্পৰ্কত ফাঁট মেলিল। তাৰ বহুবছৰৰ পাছত বিবাহ পাশতো আৱদ্ধ হল শ্যামন্তিকা।

ছচিয়েল মিডিয়াত মাজে মাজে নয়ন আৰু শ্যামন্তিকাৰ পুৰণি ফটো ভাইৰেল হয়। দুয়ো একেলগে হাঁহি মাতি থকাৰ ফটো। ফটোক লৈ ছচিয়েল মিডিয়াত বহুতে বহু কথা কয়। তাৰ সন্দৰ্ভতো তেওঁলোকে কলে- বহুতে ভাৱি থকাৰ দৰে আমাৰ মাজত একো শত্ৰুতা নাই। আমি সদায়েই ইজনে সিজনৰ অনুৰাগী। এইবোৰ কথাই কেতিয়াবা দুখ দিয়ে।

ডেমফুল আৰু জানমণিৰ সম্পৰ্ক নাথাকিলেও আজি আক্ষেপ নথকাৰ কথা নয়ন নিলীমে মুকলিকৈ কলে। তেওঁৰ মতে পৃথিৱীখন বহু বিশাল। এৰি অহা পৰিস্থিতিৰ কথা ভৱাতকৈ পৃথিৱীত কৰিব লগা আৰু বহু কাম থাকে ভৱিষ্যতৰ দিনত…