ডিজিটেল ডেস্কঃ ২৬ নৱেম্বৰ দেশৰ সংবিধান দিৱস। ১৯৪৯ চনৰ ২৬ নৱেম্বৰত অম্বেদকাৰৰ ৰচিত সংবিধানখন ভাৰতৰ সংবিধান হিচাঁপে স্বীকৃত হৈছিল আৰু ১৯৫০ চনৰ ২৬ জানুৱাৰীত কাৰ্যকৰী হৈছিল। সংবিধানখন ভাৰতৰ সংবিধান হিচাপে গ্ৰহণ কৰা দিনটোকে দেশত সংবিধান দিৱস হিচাপে পালন কৰা হয়।

প্ৰত্যেক বছৰৰ দৰে সংসদভৱনত শুকুৰবাৰে সংবিধান দিৱসৰ আয়োজন কৰা হৈছে। দেশৰ প্ৰধানমন্ত্ৰী নৰেন্দ্ৰ মোদী, ৰাষ্ট্ৰপতি ৰামনাথ কোবিন্দৰ লগতে কেইবাজনো কেন্দ্ৰীয় মন্ত্ৰীৰ উপস্থিতিত চৰকাৰীভাৱে আয়োজন কৰা হৈছে। কিন্তু চৰকাৰীভাৱে অনুষ্ঠিত কৰা সংবিধান দিৱস বিসৰ্জন কৰিছে বিৰোধী দলে। কংগ্ৰেছকে আদি কৰি ডি এম কে, শিৱসেনা, আৰ এছ পি,এন চি পি, এছ পি, এন চিপি, চি পি আই, আৰ জে ডি, আই ইউ এম এল আদিয়ে বৰ্জন কৰিছে এই বৰ্ষৰ সংবিধান দিৱস। ইয়াৰ ওপৰিও বিৰোধী দল কেইটাই স্বাধীনতাৰ অমৃত উৎসৱো বৰ্জন কৰাৰ সিদ্ধান্ত লৈছে। বিৰোধী দলকেইটাৰ মতে,’শাসিত চৰকাৰখনে নিয়মীয়াকৈ সংবিধানক অপমান কৰি আহিছে গতিকে তেনে এটা দলে সংবিধান দিৱস পতাৰ নৈতিক অধিকাৰ নাই।’

আনহাতে প্ৰধানমন্ত্ৰী নৰেন্দ্ৰ মোদীয়ে সংবিধান দিৱসত দেশৰ জনতাক সম্বোধন কৰি সংবিধানৰ গৰিমা অটুত ৰাখিবলৈ দল মত নিৰ্বিশেষে সকলোকে আহ্বান জনায়। প্ৰধানমন্ত্ৰী মোদীয়ে সংবিধান তথা গণতন্ত্ৰৰ বাবে পৰিয়ালকেন্দ্ৰীক ৰাজনীতি ভয়াৱহ বুলিও মন্তব্য কৰে।