ডিজিটেল ডেস্কঃ   বকোৰ এগৰাকী যুৱতী পলাই গৈছিল এগৰাকী যুৱকলৈ।  ঘটনাৰ বিৱৰণ মতে বকো থানাৰ অন্তৰ্গত ২নং দক্ষিণ ছেখাদাৰীগাঁৱৰ সভ্যা ৰাভা (২৩) নামৰ যুৱতী গৰাকী  ১নং দক্ষিণ ছেখাদাৰীগাঁৱৰ যুৱক প্ৰিয়দেৱ ৰাভালৈ পলাই গৈছিল। কিন্তু  প্ৰিয়দেৱ ৰাভাৰ বায়েক আৰু ভিনিহিয়েকৰ বোৱাৰী হিচাপে সভ্যা ৰাভাক পচন্দ কৰা নাছিল। কেৱল পচন্দই নহয় তেওঁলোকে প্ৰিয়দেৱ ৰাভাৰ বাবে বিয়া কৰি লৈ আহে অন্য এগৰাকী যুৱতীক।

এই কথাত মনোকষ্ট পাই নিশা প্ৰায় ১০ বজাত সভ্যা ৰাভাই ঘৰৰ কাষৰ কামাখ্যা-যোগীঘোপা ব্ৰডগজ ৰে’লপথেৰে চলাচল কৰা ৰে’লৰ সন্মুখত জপিয়াই আত্মহনন কৰে। এই ঘটনাৰ পাছতে প্ৰিয়দেৱ ৰাভাৰ পৰিয়ালৰ সদস্যক আটক কৰিছে আৰক্ষীয়ে।