ডিজিটেল ডেস্কঃ কেকেৰ মৃত্যুৰ পিছতেই বলীউডৰ পৰা আহিছে অন্য এটা উদ্বেগজনক খবৰ। ‘পৰদেশ’ চলচ্চিত্ৰৰ জৰিয়তে বলীউডত খোজ পেলোৱা নায়িকা মহিমা চৌধুৰী আক্ৰান্ত হৈছে দুৰাৰোগ্য ৰোগত৷ স্তনৰ কৰ্কট ৰোগত আক্ৰান্ত হৈছে মহিমা। তেওঁ বৰ্তমান চিকিৎসাধীন হৈ আছে।

অভিনেতা অনুপম খেৰে এটা ইনষ্টাগ্ৰাম পোষ্টৰ জৰিয়তে এই বাতৰি ৰাজহুৱা কৰে। একে সময়তে খেৰে অভিনেত্ৰীগৰাকীৰ সাহস আৰু যুঁজাৰু মনোভাবকো প্ৰশংসা কৰে৷ অনুপম খেৰে মহিমাৰ এটা ভিডিঅ’ ইনষ্টাগ্ৰামত পোষ্ট কৰিছিল। মহিমাই তেওঁৰ নিজৰ কাহিনী এই ভিডিঅ’টোত প্ৰকাশ কৰে। অনুপম খেৰে ভিডিঅ’টোৰ শিৰোনাম দিছে- ‘মহিমা চৌধুৰীৰ সাহস আৰু কৰ্কট ৰোগৰ কাহিনী৷ মই এমাহ আগতে তেওঁক আমেৰিকাৰ পৰা ফোন কৰিছিলোঁ। মই তেওঁক মোৰ ৫২৫ তম চলচ্চিত্ৰ ‘দ্য ছিগনেচাৰ’ত অভিনয় কৰাব বিচাৰিছিলোঁ। তেতিয়াই মই গম পাইছিলোঁ যে তেওঁ স্তনৰ কৰ্কট ৰোগত আক্ৰান্ত হৈ আছে। কথা পাতি মই উপলব্ধি কৰিছিলোঁ যে তেওঁৰ মনৰ শক্তিয়ে সমগ্ৰ বিশ্বৰ অগণন মহিলাক আশাৰ ৰশ্মি দিব পাৰে। তেওঁ বিচাৰিছিল যে মই সকলোকে খবৰটো কওঁ। মহিমা, তুমি আমাৰ নায়ক। বন্ধুসকল, সকলোৱে তেওঁক মৰম, শুভকামনা আৰু কল্যাণেৰে ভৰাই তোলক।’

অনুপম খেৰে মহিমাক কৰ্কট ৰোগৰ বিষয়ে কেনেকৈ জানিলে বুলি সোধাত তেওঁ কয়- ‘মোৰ ভিতৰত কোনো লক্ষণ নাছিল। মই পৰীক্ষা কৰিছিলোঁ। চিকিৎসকক লগ কৰিছিলো, চিকিৎসকে কৰ্কট ৰোগৰ প্ৰাক-কোষবোৰ দেখাৰ কথা কৈছিল। চিকিৎসকসকলে কৈছে যে এইটো ১০০ শতাংশ নিৰাময়যোগ্য। মই ভাঙি পৰিছিলো৷ কেন্সাৰ খুব ভয়ংকৰ ৰোগ৷’ ভন্তিয়ে মোক সেই সময়ৰ পৰা উঠি অহাত সহায় কৰিলে৷’

অনুপম খেৰে কৰ্কট ৰোগত আক্ৰান্ত মহিলাসকলৰ বাবে কিবা ক’বলৈ কোৱাত মহিমাই কৈছিল- ‘মই আক্ৰান্ত মহিলাসকলৰ পৰা শিকি আছোঁ। কেমোথেৰাপীৰ বাবে অহা মহিলাসকলে মোক স্বাভাৱিক কৰি তোলে। যুদ্ধখনৰ বাবে অনুপ্ৰেৰণা দিয়ে৷’