ডিজিটেল ডেস্কঃ পাৰফিউমৰ বিজ্ঞাপন মানেই যেন এখন নীলা ছবিৰ আৰম্ভণি৷ পাৰফিউমৰ প্ৰায়সমূহ বিজ্ঞাপনতেই দেখা যায় নাৰীৰ আবুৰহীন দেহ৷ অৰ্ধনগ্ন দেহত পাৰফিউম মাৰিলেই আকৃষ্ট হৈ কাষ চাপি আহে পুৰুষ৷ বহু পাৰফিউম কোম্পানীয়েই দেখুওৱাই একেধৰণৰ উত্তেজক নাৰী শৰীৰ৷ আৰু সেই বিজ্ঞাপনত আকৃষ্ট হয় বহুজনেই৷ কিন্তু এইয়া কিমানদুৰ গ্ৰহণযোগ্য! প্ৰত্যেকটো কাৰ্যৰেই সীমাৰেখা একোডাল থকা উচিত৷ সেই সীমাৰেখা অতিক্ৰম কৰিলে এসময়ত মানুহ অতিষ্ঠ হয়েই৷ তাৰেই প্ৰতিফলন এইয়া৷ শেহতীয়াভাৱে প্ৰকাশ হৈ থকা ‘লেয়াৰ শ্বট’ নামৰ পাৰফিউমৰ বিজ্ঞাপনক লৈ ক্ষুদ্ধ হৈ পৰিছে সচেতন জনতা৷ প্ৰায়সংখ্যকেই এই বিজ্ঞাপনক ধৰ্ষণৰ বাবে নতুন প্ৰজন্মক উৎসাহিত কৰা বুলিও প্ৰকাশ কৰিছে৷

কিন্তু এই বিজ্ঞাপনত কি দেখুওৱা হৈছে? ‘লেয়াৰ শ্বট’-ৰ দুটা বিজ্ঞাপনক লৈয়েই আপত্তি দৰ্শাইছে সচেতন মহলে৷ এটা বিজ্ঞাপনত দেখুওৱা অনুসৰি এগৰাকী যুৱতীয়ে এটা শ্বপিং মলত বজাৰ কৰিছে৷ বজাৰ কৰি থকা যুৱতীগৰাকীৰ পিছফালে আহি ঠিয় হয় চাৰিগৰাকী যুৱক৷ চাৰিগৰাকীৰ মাজৰে এজনে কয়, ‘চাৰিজন আছো সন্মুখত এগৰাকীয়ে শ্বট এটা লওঁ!’ সেই কথা শুনিয়েই অকণমান থতমত খাই যুৱতীগৰাকীয়ে উভটি চাই৷ যুৱতীগৰাকীৰ চকুৱে-মুখে ফুটি উঠে আতংক৷ তাৰ পিছতেই দেখুওৱা হয় ‘লেয়াৰ শ্বট’-ৰ এটা বিশে, পাৰফিউমৰ বটল৷ অৰ্থাৎ যুৱক চাৰিজনে বটলটোক লক্ষ্য কৰিহে যেন কথাষাৰ কৈছিল তাকেই দেখুওৱা হয়৷ পাৰফিউমৰ বটলটো দেখুওৱাৰ পিছতহে আতংকমুক্ত হয় যুৱতীগৰাকী৷

আনহাতে আনটো বিজ্ঞাপনটো এক যুটিয়ে ঘনিষ্ঠ সময় কটাইছে৷ সেই সময়তেই তেওঁলোকৰ ঘৰলৈ কেইজনমান বন্ধুৰ আগমন ঘটে৷ সেইসময়তেই বন্ধু এজনে প্ৰশ্ন কৰে,‘নিশ্বয় শ্বট লৈছে?’ প্ৰশ্নৰ উত্তৰত ঘনিষ্ঠ সময় কটোৱা যুৱকজনে সন্মতি জনাই৷ প্ৰেমিকৰ সন্মতিসূচক বাক্যবাণ শুনি যুৱতীগৰাকীয়ে প্ৰেমীকক উদ্দেশ্যি আচৰিত দৃষ্টি নিক্ষেপ কৰে৷ তাৰ পিছতেই দেখুওৱা হয় বিচনাৰ কাষত এটা ‘লেয়াৰ শ্বট’-ৰ পাৰফিউম বটল৷ অৰ্থাৎ ইয়াতো পাৰফিউম বটলক উদ্দেশ্যিহে কথাষাৰ কোৱা বুলি বুজোৱা হয়৷

এই দুটা বিজ্ঞাপন সম্প্ৰচাৰিত হৈ আছে সামাজিক মাধ্যমৰ লগতে অন্যান্য প্লেটফৰ্মতো৷ বিজ্ঞাপনক লৈ প্ৰশ্ন তুলিছে নেটিজেনে৷ এইয়া কেনেধৰণৰ বিজ্ঞাপন? এই বিজ্ঞাপন প্ৰচাৰ কৰি নৱপ্ৰজন্মক কি বাৰ্তা দিয়া হৈছে? টুইটাৰ আৰু ইনষ্টাগ্ৰামকে ধৰি সামাজিক মাধ্যমত বহুতেই দৰ্শাইছে আপত্তি৷ ‘বিজ্ঞাপন কোম্পানীবোৰে অশ্লীললতাৰ সকলো সীমাৰেখা অতিক্ৰম কৰিছে৷ এই বিজ্ঞাপনেৰে পৰোক্ষভাৱে নৱ প্ৰজন্মক ধৰ্ষণৰ বাবেই উৎসাহিত কৰা হৈছে৷ এই বিজ্ঞাপনক লৈ কেৱল মহিলাই আপত্তি দৰ্শাইছে এনে নহয় বহু পুৰুষেও এই বিজ্ঞাপনক লৈ আপত্তি দৰ্শোৱা পৰিলক্ষিত হৈছে৷ ইয়াৰোপৰি Advertising Standards Council of India (ASCI)-ৰ ওচৰত এক অভিযোগনামাও দাখিল কৰিছে একাংশ সচেতন মহলে৷