ডিজিটেল ডেস্কঃ পৃথিৱীৰ আটাইতকৈ অপৈণত শিশুটো জন্ম হৈছে আমেৰিকা যুক্তৰাষ্ট্ৰত। জন্মৰ সময়ত নৱজাতকটোৰ ওজন মাত্ৰ ৪২০ গ্ৰাম। নৱজাতকটো এক পাউণ্ড অৰ্থাৎ আধা কিলোতকৈ কম ওজনৰ। এই অপৈণত শিশুটোৰ জন্ম হৈছে আমেৰিকা যুক্তৰাষ্ট্ৰৰ বাৰ্মিংহামৰ আলাবামাত। এই অপৈণত শিশুটোক লৈ এতিয়া চৰ্চা চলিছে সমগ্ৰ বিশ্বতে। সাধাৰণতে গৰ্ভধাৰণৰ সময় ৪০ সপ্তাহ কিন্তু এই শিশুটো ২১ সপ্তাহ এদিনতে জন্ম হয়। ২১ সপ্তাহত জন্ম হোৱা বাবেই ইয়াক পৃথিৱীৰ ভিতৰত আটাইতকৈ অপৈণত শিশু বুলি স্বীকৃতি দিয়া হৈছে। সাধাৰণ নৱজাতকৰ তুলনাত প্ৰায় ১৯ সপ্তাহ আগতে জন্ম হৈছে এই শিশুটো।

আমেৰিকাত জন্ম লাভ কৰা এই অপৈণত শিশুটোৰ নাম কাৰ্টিছ ৰখা হৈছে। অপৈণত যদিও মাতৃ আৰু কেঁচুৱা দুয়ো স্বাস্থ্যৱান বুলি জনাইছে চিকিৎসকে। চিকিৎসকে জনোৱা অনুসৰি ২১ সপ্তাহতে জন্ম হোৱা শিশুৰ সাধাৰণতে জীয়াই থকাৰ সম্ভাৱনা অত্যন্ত কম থাকে। এনকৈ জন্ম হোৱা শিশুৰ মাত্ৰ এক শতাংশ শিশুহে জীয়াই থাকে। কাৰ্টিছ সেই এক শতাংশৰ মাজৰে এজন। বৰ্তমানো চিকিৎসালয়ৰ আইচিইউত ভৰ্তি হৈ থকা কাৰ্টিছক লৈ আশাবাদী চিকিৎসকমহলো। কিয়নো কাৰ্টিজে অন্য পৈমত শিশুৰ দৰেই প্ৰায় সুস্থ অৱস্থাতে আছে।