ডিজিটেল ডেস্কঃ দেওবাৰৰে পৰা আৰম্ভ হৈছে অসম প্ৰদেশ কংগ্ৰেছ কমিটীৰ প্ৰথমখন দুদিনীয়া কাৰ্যনিৰ্বাহক সভা। ভূপেন বৰা নেতৃত্বাধীন অসম প্ৰদেশ কংগ্ৰেছ কমিটীৰ এয়া প্ৰথমখন দুদিনীয়া কাৰ্যনিৰ্বাহক সভা। কিন্তু এই প্ৰথনখন সভাৰ প্ৰথম দিনাই উপস্থিত নাথাকিল বিৰোধীৰ উপ-দলপতি তথা চামগুৰি সমষ্টিৰ বিধায়ক ৰকিবুল হুছেইন।

বিধায়ক তথা প্ৰাক্তন মন্ত্ৰীগৰাকী উপস্থিত নথকাৰ খবৰটো প্ৰচাৰ হোৱাৰ পাছতে আন এক চৰ্চা আৰম্ভ হল। চৰ্চা হল যে, কংগ্ৰেছ নেতৃত্বৰ প্ৰতি কিবা ক্ষোভ বা অসন্তুষ্টি আছে নেকি বিধায়কগৰাকীৰ। লগতে চৰ্চা হল কংগ্ৰেছ এৰাৰ যোজা কৰিছে নেকি জ্যেষ্ঠ নেতাগৰাকীয়ে। এনেবোৰ গুজব চলি থকাৰ মাজতে এই বিষয়ৰ সন্দৰ্ভত স্পষ্টীকৰণ দিলে ৰকিবুল হুছেইনে।

সমষ্টিৰ কামত ব্যস্ত আছিলোঁ বাবেই দেওবাৰৰ কাৰ্যনিৰ্বাহক সভাত অংশ ল’ব পৰা নাই বুলি কয় ৰকিবুল হুছেইনে। উল্লেখযোগ্য যে দেওবাৰৰ সন্ধিয়াৰ বিৰোধীৰ উমৈহতীয়া বিধায়িনী বৈঠকত উপস্থিত আছিল ৰকিবুল হুছেইন। দিনৰ ভাগত এই কথা সভাপতি ভূপেন বৰাক জনোৱা বুলিও সদৰি কৰে তেওঁ।