ডিজিটেল ডেস্কঃ বিয়া পতা মাত্ৰ দুমাহ হৈছিলহে। গাৰ পৰা মা-হালধিৰ গোন্ধ যোৱাই নাছিল। গোলাঘাট জিলাৰ লোণপুৰীয়া গাঁৱৰ ১৯ বছৰীয়া যুৱতী কৰিনা বৰুৱাৰ মৃতদেহ এতিয়া পৰি আছে তামিলনাডুৰ তিৰুপুৰৰ এখন চিকিৎসালয়ৰ মৰ্গত। বিয়াৰ পিছতে স্বামী পংকজ শইকীয়াই কৰ্মস্থলী তামিলনাডুৰ তিৰুপুৰলৈ লৈ গৈছিল কৰিনাক। আৰু কিছুদিনৰ পিছতে আহিল এই খবৰটো।

অভিযোগ অনুসৰি, বিগত কিছুদিন ধৰি কৰিনাই ফোনযোগে মাতৃ মাখনি বৰুৱাক স্বামী পংকজে অত্যাচাৰ চলোৱাৰ বিষয়ে অৱগত কৰি আহিছিল। যৌতুকৰ দাবীতে প্ৰায়ে পংকজে প্ৰায়ে অত্যাচাৰ চলোৱাৰ কথা ফোনযোগে পৰিয়ালক জনাইছিল তাই। অৱশ্যে বিগত কিছুদিন ধৰি ফোনো অফ কৰি ৰাখিছিল কৰিনাই। তেনেস্থলত পংকজে পৰিকল্পিতভাৱে কৰিনাক হত্যা কৰি আত্মহত্যাৰ ৰূপ দিয়াৰ অভিযোগ উত্থাপন কৰিছে পৰিয়ালবৰ্গই।

যোৱা ২১ মাৰ্চত স্বামী পংকজে কৰিনাৰ পিতৃ–মাতৃক ফোন কৰি জনালে সেই দুঃখবৰটো। চিপ লোৱা অৱস্থাত উদ্ধাৰ হৈছে কৰিনাৰ মৃতদেহ।  বিয়াৰ দুমাহ পিছতে জীয়ৰীৰ এই অকাল মৃত্যুত ভাগি পৰিছে পিতৃ পৰিয়াল। ইতিমধ্যে কৰিনাৰ পৰিয়ালৰ তৰফৰ পৰা ৰুজু কৰা হৈছে গোচৰ।  উল্লেখ কৰা প্ৰয়োজন যে, পৰিয়ালৰ অগোচৰে  অচিনাকি পংকজ শইকীয়াৰ সৈতে  বিয়াত বহিছিল কৰিনা।