ডিজিটেল ডেস্কঃ খুবেই ধুনীয়া! নিৰ্মাণ হোৱা দিনাৰে পৰা দিছপুৰ ছুপাৰ মাৰ্কেট উৰণীয়া সেতুখনক লৈ ভিন্ন চৰ্চা। এগৰাকী অসমীয়া ঠিকাদাৰে ২২মাহৰ কাম ১৪মাহতে শেষ কৰাৰ পৰা আৰম্ভ কৰি সেতুখনত শেহতীয়াকৈ অসমৰ লোক-সংস্কৃতি প্ৰতিফলিত হোৱালৈকে হাজাৰ ৰকমৰ চৰ্চা ছচিয়েল মিডিয়াত। চৰ্চাৰ মাজতে দীপাৱলীৰ দিনাই মুখ্যমন্ত্ৰীয়ে উদ্বোধন কৰিলে এই সেতুখন আৰু কলে- অসমৰ ভিতৰতে এইখন এখন লেখত লবলগীয়া উৰণীয়া সেতু।

উদ্বোধন হোৱাৰ পিছতে উৰণীয়া সেতুখনত পৰিল গুটখা-তামোলৰ পিক। সকলোতে পুনৰ চৰ্চা। একাংশ কাণ্ডজ্ঞানহীন লোকৰ এনে মানসিকতাক সকলোৱে একেমুখে গৰিহণা দিলে। ছচিয়েল মিডিয়াত ভাইৰেল হৈ পৰিল পিক  পেলোৱা এই সেই বিশেষ ফটোকেইখন। লাহে লাহে বিষয়টো কিছু নিৰ্বাপিত হৈছিলহে, এনেতে মঙলবাৰে পুৱাৰ ভাগতে ছচিয়েল মিডিয়াত ভাইৰেল হৈ পৰিল এই বিশেষ ফটোখন।

দিছপুৰ উৰণীয়া সেতুঁখনত কোনোবা এটা পৰিয়ালে উদযাপন কৰিলে জন্মদিন। পৰিয়ালটোৰ সন্দৰ্ভত কোনো তথ্যই এতিয়ালৈকে লাভ কৰা নাই যদিও ছচিয়েল মিডিয়াত এই বিষয়টোক লৈ এতিয়া ব্যাপক চৰ্চা। ধুনীয়াকৈ সজাই পৰাই তোলা সেতুখন ৰেষ্টুৰেন্ট বুলি ভুলতে এনে কাম কৰিছে বুলিও একাংশ নেটিজেনে মন্তব্য কৰিছে। ইয়াৰ মাজতে একাংশই এইবুলিও যুক্তি দৰ্শাইছে যে, নতুনকৈ নিৰ্মাণ কৰা সেতুখনত জন্মদিন বুলি সপৰিয়ালে তোলো এখন ফটোক লৈ ইমান চৰ্চা কৰি লাভ নাই।