উৰিয়ামঘাটৰ ৰেংমা বনাঞ্চলত কোনো ব্যক্তিক সংস্থাপন দিয়া নাছিলে পূৰ্বৰ মুখ্যমন্ত্ৰী গোলাপ বৰবৰাই। এই মন্তব্য মুখ্যমন্ত্ৰী গোলাপ বৰবৰাৰ পুত্ৰ তথা অসম প্ৰদেশ বিজেপি কৃষক মৰ্চাৰ ৰাজ্যিক সভাপতি পংকজ বৰবৰাৰ। তেওঁ উল্লেখ কৰে যে উৰিয়ামঘাটৰ ৰেংমা বনাঞ্চলত অবৈধভাৱে ভূমি দখল কৰি বসবাস কৰি থকা উচ্ছেদিত দুজনমান লোকে সাক্ষাত্কাৰত কয় যে ১৯৭৩-৭৪ চনত উৰিয়ামঘাটত তদানীন্তন মুখ্যমন্ত্ৰী গোলাপ বৰবৰাৰ চৰকাৰে তেওঁলোকক সংস্থাপিত কৰিছিল, যিটো একেবাৰে অসত্য কথা। প্ৰকৃত সত্য হৈছে যে গোলাপ বৰবৰাই মুখ্যমন্ত্ৰীৰ দায়িত্বভাৰ লৈছিল ১৯৭৮ চনত। এইসকল মন্তব্যৰ লগত গোলাপ বৰবৰাৰ চৰকাৰৰ কোনো বিষয় জড়িত নহয়। অৱশ্যে কিছু ভূমিহীন খিলঞ্জীয়া লোকক ১৯৭৮-৭৯ চনত দয়াঙত ভূমি আৱন্তন দিছিল কিন্তু উৰিয়ামঘাটত নহয়। পৰৱৰ্তী সময়ত যেতিয়া অসম জনতা পাৰ্টীয়ে চৰকাৰ গঠন কৰে তেতিয়া খিলঞ্জীয়া ভূমিহীন লোকসকলৰ লগতে খিলঞ্জীয়া জনগোষ্ঠীসমূহকো পুনৰ ঘিলাধাৰী চাহ বাগিছাৰ কিছু ভূমি পট্টা প্ৰদান কৰা হৈছিল। লগতে তেওঁ মন্তব্য কৰে যে মুখ্যমন্ত্ৰী হিমন্ত বিশ্ব শৰ্মাই অসমৰ প্ৰথম অকংগ্ৰেছী চৰকাৰৰ মুখ্যমন্ত্ৰী প্ৰয়াত গোলাপ বৰবৰাৰ জন্ম শতবাৰ্ষিকী পালন কৰিবলৈ লোৱা সিদ্ধান্তক সমগ্ৰ অসমবাসীয়ে আদৰণি জনাইছে। যাৰ বাবে গোলাপ বৰবৰাৰ ওপৰত মিছা অভিযোগ উত্থাপন কৰি মুখ্যমন্ত্ৰী ড০ হিমন্ত বিশ্ব শৰ্মা আৰু চৰকাৰক বদনাম কৰাৰ ষড়যন্ত্ৰ ৰচনা কৰিছে বুলিও মন্তব্য কৰে। অসম চৰকাৰৰ দ্বাৰা যি অবৈধ দখলকাৰীক উচ্ছেদ চলাইছে সেয়া অসমৰ ভৱিষ্যত প্ৰজন্মৰ ৰাজনৈতিক আৰু ভূমি অধিকাৰৰ কাৰণে এক ঐতিহাসিক পদক্ষেপ হিচাপে চিহ্নিত হ’ব বুলি উল্লেখ কৰে পংকজ বৰবৰাই। সাম্প্ৰতিক সময়ত অসমীয়া সভ্যতা সংস্কৃতি ৰক্ষাৰ বাবে এই উচ্ছেদ আটাইতকৈ প্ৰয়োজনীয় ইয়াৰ জৰিয়তে অনন্তকাললৈ খিলঞ্জীয়া অসমীয়া সুৰক্ষিত হৈ থাকিব বুলি উল্লেখ কৰে গোলাপ বৰবৰাৰ পুত্ৰ পংকজ বৰবৰাই।