ডিজিটেল ডেস্কঃ শিক্ষাৰ্থীৰ জীৱনক লৈ হেতালী খেলিছে একাংশ শিক্ষানুষ্ঠানে৷ ভুৱা শিক্ষা প্ৰতিষ্ঠান খুলি শিক্ষাৰ্থীৰ ভৱিষ্যত অন্ধকাৰলৈ থেলি দিছে AJ Group of Institute শিক্ষানুষ্ঠানটোৱে৷ গুৱাবাটী মহানগৰী ধাৰাপুৰত অবস্থিত AJ Group of Institute ৰ স্বত্বাধিকাৰী আব্দুল জব্বৰ ওপৰত ভুৱা শিক্ষা প্ৰতিষ্ঠান খুলি ছাত্ৰ ছাত্ৰীৰ জীৱন অন্ধকাৰ কৰাৰ অভিযোগ উত্থাপিত হৈছে৷ অভিযোগ মৰ্মে মহানগৰ আৰক্ষীয়ে জব্বৰৰ বিৰুদ্ধে তদন্ত অব্যাহত ৰাখিছে৷ AJ Group of Institute টোৱে দীৰ্ঘদিন ধৰি যাৱতীয়া নথি পত্ৰ নোহোৱাকৈ প্ৰায় ডেৰৰ পৰা দুই লক্ষাধিক টকা লৈছিল নামভৰ্তিৰ নামত৷ লগতে বিভিন্ন প্ৰলোভনৰ জৰিয়তে নামভৰ্তি কৰোৱাৰ অভিযোগ আব্দুল জব্বৰ বিৰুদ্ধে৷

তাৰোপৰি ছাত্ৰী-ছাত্ৰী সকলক চাকৰিৰ প্ৰলোভনেৰে বি-ফাৰ্ম, জেনেৰেল নাৰ্চিং এণ্ড মিডৱাইফাৰী আৰু বিএছচি নাৰ্ছিং ৰ পৰীক্ষা দিয়াৰ বাবে লৈ গৈছিল বেংগালুৰুলৈ। কিন্তু AJ GROUP OF ইনষ্টিটিউটৰ লাইচেঞ্চ নোহোৱা হেতুকে ছাত্ৰ-ছাত্ৰীসকলক পৰীক্ষাত বহিবলৈ দিয়া নাছিল বেংগালুৰুৰ শিক্ষা প্ৰতিষ্ঠানখনে। ছাত্ৰ-ছাত্ৰীসকলে এই সমস্যাৰ সন্মুখীনহৈ উভতি আহি প্ৰতিষ্ঠানটোৰ বিৰুদ্ধে আজাৰা আৰক্ষী থানাত এজেহাৰ দাখিল কৰে। এজেহাৰৰ ভিত্তিত আৰক্ষীয়ে অভিযুক্ত ইনামূল হক চিকদাৰ আৰু ইলিয়াছ হাচানক আটক কৰে যদিও AJ Group of Institute ৰ স্বত্বাধিকাৰী আব্দুল জব্বৰক আটক কৰিবলৈ সক্ষম হোৱা নাই আৰক্ষীয়ে৷ যাৰ বাবে এতিয়া প্ৰতিবাদত বহিছে শিক্ষানুষ্ঠানখনৰ ছাত্ৰ-ছাত্ৰীসকলে৷