ডিজিটেল ডেস্কঃ উত্তৰ-পূবত বিজেপিৰ জনপ্ৰিয়তা কমা নাই। এই কথা পুনৰ এবাৰ বাস্তৱত প্ৰমাণিত কৰিলে ৩ৰাজ্যৰ নিৰ্বাচনী ফলাফলে। প্ৰত্যক্ষ বা পৰোক্ষভাৱে তিনিওখন ৰাজ্যৰে শাসনৰ বাঘজৰী নিজৰ হাতত ৰাখিবলৈ সক্ষম হল বিজেপি। মিত্ৰজোঁটৰ সৈতে আসনৰ বুজা-বুজি আৰু সকলো নিৰ্বাচনী ৰণনীতি বিজেপিৰ বাবে অতি ফলদায়ক হিচাপে বিবেচিত হল মেঘালয়, নাগালেণ্ড আৰু ত্ৰিপুৰা নিৰ্বাচনত।

মেঘালয়ত এন পি পি ৰ সৈতে মিত্ৰতা কৰি বিজেপিয়ে শাসনৰ বাঘজৰী নিজৰ হাতত ৰাখিলে। ৰাজ্যখনত এন পি পিয়ে ২৫খন আসনত অগ্ৰগতি লাভ কৰাৰ বিপৰীতে বিজেপি আগবাঢ়ি আছে ৩খন আসনত। উল্লেখ কৰা প্ৰয়োজন যে, এন পি পিয়ে এতিয়ালৈকে ১৫খন আসনত বিজয় সাব্যস্ত কৰিছে।

ইফালে ত্ৰিপুৰাত অকলেই চৰকাৰ গঠন কৰাৰ দিশে আগবাঢ়িছে বিজেপি। ২৪খন আসনত ইতিমধ্যে জয়ী হোৱা বিজেপি বাতৰি লিখা পৰলৈকে আৰু ৮খন আসনত অগ্ৰগতি লাভ কৰি আছে। ৰাজ্যখনত তিপ্ৰা মথাই ১২খন আসনত জয় সাব্যস্ত কৰিছে।

নাগালেণ্ডতো বিজেপি মিত্ৰজোঁটৰ জয় জয় ময় ময় অৱস্থা। ৰাজ্যখনত বিজেপিয়ে ১২খন আৰু এন ডি পি পিয়ে ২৪খন আসন নিজৰ দখলত ৰাখিবলৈ সক্ষম হৈছে।

এনেদৰেই উত্তৰ পূবৰ তিনিওখন ৰাজ্যত বিজেপিৰ অপ্ৰতিৰোধ্য যাত্ৰা অব্যাহত থাকিল বিধানসভা নিৰ্বাচনত।