ডিজিটেল ডেস্কঃ ‘অযোধ্যাত সূৰ্যোদয়’ চলমান খুৰ্ছিদৰ বিশেষ গ্ৰন্থখনে বিজেপি আৰু কংগ্ৰেছ দলৰ ৰাজনৈতিক হাঁথিয়াৰ হৈ পৰিছে। কিতাপখন যদিও প্ৰকাশ হোৱাৰ পিছতেই বন্ধ কৰি দিয়া হৈছে কিন্তু কিতাপখনক লৈ বিতৰ্ক আজিও অব্যাহত।

‘অযোধ্যাত সূৰ্যোদয়’ত কি লিখিছিল চলমানে?

চলমান খুৰ্ছিদৰ নতুন গ্ৰন্থ,’অযোধ্যত সূৰ্যোদয়’ক লৈ বিজেপি, কংগ্ৰেছ দুয়ো দলৰ মাজত বাক-বিতণ্ডা চলি আছে। বিজেপি কৰ্মীসকলৰ অভিযোগ চলমান খুৰ্ছিদে সমগ্ৰ হিন্দুসম্প্ৰদায়টোকে জেহাদী সংগঠনৰ সৈতে তুলনা কৰিছে। কংগ্ৰেছ নেতা ৰাহুল গান্ধীয়েও শেহতীয়াভাৱে গ্ৰন্থখনকলৈ মন্তব্য কৰিছে। বিজেপি দল আৰু আৰএছএছক টাৰ্গেট কৰি ৰাহুল গান্ধীয়ে কয়, ‘এতিয়া দেশত দুটাই মতাদৰ্শ চলিছে, এটা কংগ্ৰেছৰ আদৰ্শ আনটো আৰএছএছৰ আদৰ্শ। বিজেপি দলৰ নিজা কোনো আদৰ্শ নাই কেৱল আৰএছএছৰ মতাদৰ্শ মানিহে এই দলটো পৰিচালিত হয়। কংগ্ৰেছৰ আদৰ্শ হৈছে দেশত সম্প্ৰীতিৰ এনাজৰীডাল বান্ধি ৰখা আৰু আৰএছএছৰ কাম হৈছে দেশত ধৰ্মবিদ্বেষ তথা ঘৃণা বিয়পোৱা।কংগ্ৰেছ পৰিচালিত হয় মহাত্মা গান্ধীৰ অহিংস আদৰ্শেৰে আৰু আৰএছএছ পৰিচালিত হয় সাভাৰকাৰৰ আদৰ্শেৰে। সাভাৰকাৰৰ আদৰ্শেৰে পৰিচালিত হোৱা সংগঠনে চলমান খুৰ্ছিদৰ লেখাৰ সাৰমৰ্ম বুজি নোপোৱাটোৱেই স্বাভাৱিক।’ বুলি মন্তব্য কৰিছে ৰাহুল গান্ধীয়ে।

ৰাজনৈতিক বাক-বিতণ্ডাৰ বাবেই অযোধ্যাত সূৰ্যোদয় নহয় সূৰ্যাস্তহে হৈছে !

ভিন্ন সময়ত মতাদৰ্শগত যুঁজখন কংগ্ৰেছ-বিজেপিৰ মাজত চলি আছে। ‘অযোধ্যাৰ সূৰ্যোদয়’ৰ প্ৰকাশ যেন দুয়োটা দলৰে ৰাজনৈতিক অচিলা হৈ আহিল। গ্ৰন্থখন প্ৰকাশৰ পিছৰে পৰাই দুয়োটা দলেই নিজা নিজা যুক্তিৰে গ্ৰন্থখনৰ সপক্ষে বিপক্ষে মন্তব্য দাঙি ধৰিবলৈ আৰম্ভ কৰিছে। সাধাৰণ পঢ়ুৱৈৰ হাতত পৰাৰ পূৰ্বেই ৰাজনৈতিক বুদ্ধিজীৱিৰ বিশ্লেষণৰ পিছতেই বন্ধ হৈ পৰা কিতাপখনত চলমানে উল্লেখ কৰিছিল অযোধ্যাৰ ৰায়সম্পৰ্কে। ইয়াৰোপৰি তেওঁ উল্লেখ কৰিছে, ‘হিন্দু ধৰ্ম আৰু হিন্দুত্বৰ মাজত পাৰ্থক্য আছে। যদি আপুনি হিন্দু, আপোনাক হিন্দুত্বৰ আভূষণৰ জানো প্ৰয়োজন আছে। কবীৰ, গুৰু নানক, মহাত্মা গান্ধীকে আদি কৰি বহু মনীষীয়ে এই আদৰ্শেৰে বাট বুলি ভাৰতীয় সভ্যতাক চহকী কৰি থৈ গৈছে। এই আদৰ্শ এই ধৰ্মকলৈ পৃথক মতাদৰ্শ সৃষ্টি কৰাৰ জানো প্ৰয়োজনীয়তা আছে?’

কংগ্ৰেছ দলে হিন্দুসকলৰ বিৰুদ্ধে মকৰাসদৃশ ঘৃণাৰ জাল বনাইছে!

উল্লেখ্য যে, কংগ্ৰেছৰ জ্যেষ্ঠ নেতা তথা উচ্চতম ন্যায়ালয়ৰ অধিবক্তা চলমান খুৰ্ছিদে অযোধ্যা সন্দৰ্ভত উচ্চতম ন্যায়ালয়ৰ ৰায়ক কেন্দ্ৰ কৰিয়েই গ্ৰন্থখন লিখিছে। খুৰ্ছিদে কৈছে যে, তেওঁ গ্ৰন্থখনৰ জৰিয়তে অযোধ্যাক লৈ চৰকাৰে দিয়া সিদ্ধান্তটোৰ কাৰণ আৰু উদ্দেশ্য দেশৰ জনতাক বুজাব বিচাৰে। কিন্তু এই কথা জনতাক বুজাবলৈ যোৱাৰ বাবেই চলমান খুৰ্ছিদৰ গ্ৰন্থখন বিজেপিৰ লক্ষ্য হৈ পৰে। বিজেপিৰ মুখপাত্ৰ গৌৰৱ ভাটিয়াই বৃহস্পতিবাৰে চলমান খুৰ্ছিদক আক্ৰমণ কৰি কয়, “এয়া হিন্দুত্বৰ বিৰুদ্ধে কংগ্ৰেছৰ এটা ডাঙৰ ষড়যন্ত্ৰ আৰু তেওঁলোকৰ আদৰ্শও হিন্দুসকলৰ বিৰুদ্ধে। এয়া কেৱল হিন্দুসকলৰ অনুভূতিকে নহয়, ই ভাৰতৰ আত্মাকো গভীৰভাৱে আঘাত কৰে। কংগ্ৰেছ দলে হিন্দুসকলৰ বিৰুদ্ধে মকৰাসদৃশ ঘৃণাৰ জাল বনাই আছে।’ একে সময়তে, তেওঁ কংগ্ৰেছ অধ্যক্ষ ছোনিয়া গান্ধীক চলমান খুৰ্ছিদৰ বিৰুদ্ধে ব্যৱস্থা ল’বলৈ দাবী জনাইছে।