ডিজিটেল ডেস্কঃ এজন সফল ব্যৱসায়ী ৰতন টাটা৷ ৰতন টাটাৰ এই সাফল্যৰ আঁৰত বাৰু কি আছে? ৰতন টাটাই প্ৰত্যেক সময়তে অনুশীলন কৰে বিশেষ পাঁচোটা মন্ত্ৰ৷ কি এই মন্ত্ৰ জানেনে? ৰতন টাটাৰ নাম নজনা নাগৰিক হয়তো দেশত খুব কমেই আছে৷ কেৱল দেশতেই নহয় বিদেশতো টাটাৰ সমাদৰক কোনোৱে নুই কৰিব নোৱাৰে৷ বৰ্তমান পৃথিৱীৰ সৰ্বাধিক ধনী ব্যক্তি এলন মাস্কেও বহু সময়ত বিভিন্ন সাক্ষাৎকাৰত ৰতন টাটাৰ নাম উচ্চাৰণ কৰে৷ ৰতন টাটাক দেখিয়েই বহুলোকে তেওঁৰ দৰে হোৱাৰ বাসনাও মনে মনে নকৰা নহয়৷ ৰতন টাটাৰ ব্যৱসায়ে পৃথিৱীতেই প্ৰতিষ্ঠা লাভ কৰাৰ মূলমন্ত্ৰ নিজেই প্ৰকাশ কৰিছে ৰতন টাটাই৷ ৰতন টাটাই আগবঢ়োৱা বিশেষ ৫ টা মূলমন্ত্ৰৰ ভিতৰত প্ৰথমেই আছে-

 নিজৰ কৰ্মচাৰীসকলৰ সৈতে থাকক

আপুনি যিমানেই ডাঙৰ ব্যৱসায়ীয়েই নহওক, ব্যৱসায় যিমান স্থানতেই নাথাকক কিয়, আপুনি আপোনাৰ কৰ্মচাৰীৰ সৈতে সময় কটাওক৷ তেওঁলোকৰ সৈতে বন্ধুুত্বৰ সম্পৰ্ক বৰ্তাই ৰাখি তেওঁলোকৰ কামকাজ অনুসৰণ কৰক৷ কৰ্মচাৰীসকলৰ সৈতে কোনোকাৰণতে বেয়া ব্যৱহাৰ নিদিব৷ আপোনাৰ এই আচৰণে আপোনাৰ সফলতাৰ বাটত মসৃণতা আনিব৷

কৰ্মচাৰীক আঁতৰাই পঠিওৱাই সমাধান নহয়

যিয়েই ব্যৱসায় নহওক মাজে-সময়ে সকলোৱে বিপৰ্যয়ৰ সন্মুখীন হোৱাটো স্বাভাৱিক কথা৷ লাভৰ পৰিমানো উঠা-নমা হোৱাটো স্বাভাৱিক৷ তাৰ মাজতেই বৰ্তমান এনে এক ট্ৰেণ্ড গঢ় লৈছে যে লাভালাভ কিছু কম হ’লেই কৰ্মচাৰীসকলক কৰ্মক্ষেত্ৰৰ পৰা বিদায় দিয়া হয়৷ সেয়া একেবাৰেই ভুল পন্থা৷ অত্যাধিক কৰ্মচাৰী আঁতৰাই পঠোৱাটোৱে প্ৰতিষ্ঠানটোৰ গৰিমাত আঘাত হানে৷ টাটাই কেতিয়াও তেনে পন্থা গ্ৰহণ নকৰে৷ আনকি কভিডৰ বিপৰ্যয়ৰ সময়খিনিতো টাটাই একমাত্ৰ ব্যতিক্ৰম বহুজাতিক কোম্পানী যিয়ে এজনো কৰ্মচাৰীক আঁতৰি যাবলৈ নিৰ্দেশ দিয়া নাই বা দৰমহাৰ পৰিমানো কমাই অনা নাই৷

আপোনাৰ ঐক্যই আপোনাৰ শক্তি

কঠিন সময় প্ৰত্যেকৰে ব্যৱসায় বা জীৱনলৈ আহেই৷ কঠিন সময়ত ঐক্যবদ্ধ হৈ থকাটো সফলতাৰ মূলমন্ত্ৰ৷ কঠিন সময়ত যদি আপুনি আপোনাৰ প্ৰতিষ্ঠানৰ কৰ্মীৰ সৈতে ঐক্যবদ্ধ হৈ থাকিব পাৰিছে তেন্তে আপোনাৰ হৰুৱাব পৰা কোনো শক্তিয়েই নাই৷

 তৈয়াৰ কৰা সামগ্ৰীৰ দৰ বজাৰত থকাটো খুবেই প্ৰয়োজন

আপোনাৰ কোম্পানীত তৈয়াৰ কৰা সামগ্ৰীৰ দৰ বজাৰত সকলো সময়তে থকাৰ উপযোগী হোৱাটো প্ৰয়োজন৷ নহলে ব্যৱসায়ত অগ্ৰগতি কৰা সম্ভৱপৰ নহয়৷ টাটা কোম্পানীৰ আটাইতকৈ লেখত ল’বলগীয়া কথাই হৈছে টাটাই নিৰ্মাণ কৰা সামগ্ৰীৰ দৰ বজাৰত প্ৰত্যেকসময়তে থাকে৷ টাটাই যুৱ প্ৰজন্মৰ কৰ্মচাৰীৰ সৈতে কাম কৰাটো আটাইতকৈ বেছি পছন্দ কৰে৷ যুৱ প্ৰজন্মৰ কৰ্মচাৰী সৰ্বাধিক থকা হিচাপেও টাটা কোম্পানীটোৰ নাম বহুতেই ল’ব খোজে৷