Current Trend Assam Political Desk- দিল্লী বিধানসভাৰ বহু চৰ্চিত নিৰ্বাচনৰ ভোটগ্রহণ সমাপ্তিৰ পিচতেই প্ৰায় এঘাৰটাকৈ প্রতিষ্ঠানে প্রকাশ কৰিছে ভোটফেৰৎ সমীক্ষা তথা এগজিট প’লৰ ফলাফল। এঘাৰটা ভোটফেৰৎ সমীক্ষাৰ ৯ টাৰে পূৰ্বানুমান গৈছে কেন্দ্রত শাসনাধিষ্ঠিত বিজেপিৰ সপক্ষে। মাত্র দুটা প্রতিষ্ঠানৰ সমীক্ষাৰ ফলাফল দিল্লীৰ শাসনাধিষ্ঠিত আপৰ পক্ষত। ৭০ জনীয়া দিল্লী বিধানসভাৰ নিৰ্বাচনত যদিহে এইবাৰৰ নিৰ্বাচনত বিজেপিৰ বিজয় সম্ভব হয়, তেন্তে সুদীর্ঘ ২৭ বছৰৰ পিচত দেশৰ ৰাজধানী দিল্লীত ক্ষমতাত অধিষ্ঠিত হ’ব গেৰুৱা দলটো। মেট্রিজ, চাণক্যকে ধৰি ৯টা প্রতিষ্ঠানৰ ভোটফেৰৎ সমীক্ষাৰ গড় হিচাপত বিজেপিয়ে ৩৯ খন আসন দখল কৰি ক্ষমতা লাভ কৰিব। তাৰ বিপৰীতে আপে গড়ে ৩০ খন আসনহে লাভ কৰাৰ সম্ভাৱনা আছে। চৰকাৰ গঠনৰ বাবে প্রয়োজন ৩৬ খন আসন। বুধবাৰে বিয়লি ৬ বজাত সমাপ্ত হোৱা ভোটদানত মাত্র ৫৮ শতাংশ (৫৭.৫৮) ভোটাৰেহে ভোটদান সাব্যস্ত কৰে। বুধবাৰে বিয়লি প্রকাশিত প্রধান প্রতিষ্ঠান চাণক্য, মেট্রিজ, পোল ডায়েৰী, ডি বি ৰিছার্চ, পি মার্ক আদিয়ে স্পষ্টভাৱে ঘোষণা কৰিছে এইবাৰৰ নিৰ্বাচনত আপৰ পতন অনিবার্য। মাত্র দুটা প্রতিষ্ঠান মাইণ্ড ব্রিংক আৰু বি পি ছাইডৰ ভোটফেৰৎ সমীক্ষা গৈছে আপৰ সপক্ষে। বি পি ছাইডৰ মতে আপে লাভ কৰিব ৪৬ খনৰ পৰা ৫২ খন আসন। তাৰ বিপৰীতে বিজেপিয়ে লাভ কৰিব ১৮ খনৰ পৰা ২৩ খন আসন। মাইন্ড ব্রিংকৰ মতে আপে ৪৪ খনৰ পৰা ৪৯ খন আসন লাভ কৰি পুনৰ ক্ষমতাত অধিষ্ঠিত হ’ব। বিজেপিয়ে ২১ খনৰ পৰা ২৫ খন আসন লাভতেই সন্তুষ্ট থাকিব লাগিব। অধিকাংশ সমীক্ষামতে এইবাৰো নিৰাশ হ’ব শতাব্দী প্রাচীন দল কংগ্রেছ। চাণক্য স্ট্রেটেটিজে অৱশ্যে তিনিখন আসনত কংগ্রেছ জয়ী হ’ব বুলি পূৰ্বানুমান কৰিছে। অৱশ্যে অহা ৮ ফেব্ৰুৱাৰী, শনিবাৰে অনুষ্ঠিত হ’ব লগা ভোটগণনাই প্রতিপন্ন কৰিব দিল্লীবাসীৰ মত কোন দলৰ সপক্ষে কোন দলৰ বিপক্ষে। এইবাৰৰ নিৰ্বাচনত আপৰ পৰম্পৰাগত ভোটবেংকৰ ব্যাপক খহনীয়া হোৱাৰ ইংগিত পোৱা গৈছে। ২০১৫ আৰু ২০২০ চনৰ নিৰ্বাচনত আপৰ বিপুল বিজয় নির্ণয় কৰিছিল বস্তি আৰু অকর্তৃত্বশীল কলনিৰ ভোটাৰে। আপৰ এই ভোটবেংকত বিজেপিৰ প্রৱেশ এইবাৰ লক্ষণীয়। মুছলিম আৰু দলিত ভোটৰ বৃহৎ অংশ এইবাৰ কংগ্ৰেছে কাঢ়ি লোৱাৰ ইংগিত স্পষ্ট হৈছে। আপৰ পৰম্পৰাগত ভোটবেংকৰ খহনীয়া যদিহে বিজেপিয়ে প্রকৃততে কৰিছে, তেন্তে কেজৰিৱালৰ দল ক্ষমতাচ্যুত হোৱাৰ সম্ভাবনা প্রবল। একেদৰে দিল্লী নির্বাচনত নির্ণায়ক ভূমিকা লোৱা পূব উত্তৰ প্রদেশ আৰু বিহাৰৰ ভোটাৰেও (পূর্বাঞ্চলীয়) এইবাৰ বিজেপিৰ সপক্ষে ভোটদান কৰা বুলি অনুমান কৰা হৈছে। ১০ টা প্ৰতিষ্ঠানৰ ভোটফেৰৎ সমীক্ষা এনেধৰণৰ

চাণক্য স্ট্রেটেটিজৰ মতে আপে লাভ কৰিব ২৫-২৮ খন আসন বিজেপিয়ে লাভ কৰিব ৩৯-৪৪ খন আসন কংগ্রেছে লাভ কৰিব ২-৩ খন আৰু অন্যান্যই শূন্যখন। মেট্রিজৰ মতে আপে লাভ কৰিব ৩২-৩৭ খন আসন বিজেপিয়ে লাভ কৰিব ৩৫-৪০ খন আসন কংগ্রেছে লাভ কৰিব আৰু অন্যান্যই ০-১ খন আসন। পিপলছ পার্লছৰ মতে আপে লাভ কৰিব ১০-১৯ খন আসন বিজেপিয়ে লাভ কৰিব ৫১-৬০ খন আসন কংগ্রেছে লাভ কৰিব শূন্যখন আসন আৰু অন্যান্যয়ো লাভ কৰিব শূন্যখন আসন। পি মার্কৰ মতে আপে লাভ কৰিব ২১-৩১ খন আসন, বিজেপিয়ে লাভ কৰিব ৩৯-৪৯ খন আসন, কংগ্ৰেছ ০-১ আৰু অন্যান্যই শূন্যখন। জে ভি চিৰ মতে আপে লাভ কৰিব ২২-৩১ খন আসন বিজেপিয়ে লাভ কৰিব ৩৯-৪৫ খন, কংগ্ৰেছ ০-২ আৰু অন্যান্যই শূন্যখন। পিপলছ ইন ছাইটৰ মতে আপে লাভ কৰিব ২৫-২৯ খন আসন বিজেপিয়ে লাভ কৰিব ৪০-৪৪ খন আসন, কংগ্ৰেছ ০-২ আৰু অন্যান্যই শূন্যখন। মাইন্ড ব্রিংকৰ মতে আপে লাভ কৰিব ৪৪-৪৯ খন আসন বিজেপিয়ে লাভ কৰিব ২১-২৫ খন আসন কংগ্রেছে লাভ কৰিব শূন্যখন আৰু অন্যান্যয়ো লাভ কৰিব শূন্যখন আসন। পোল ডায়েৰীৰ মতে আপে লাভ কৰিব ১৮-২৫ খন আসন বিজেপিয়ে লাভ কৰিব ৪২ ৰ পৰা ৫০ খন আসন কংগ্রেছে লাভ কৰিব ০-২ খন আৰু অন্যান্যই শূন্যখন। এছ এ এছ মতে আপে লাভ কৰিব ৩৭-৩০ খন আসন, বিজেপিয়ে লাভ কৰিব ৩৮-৪১ খন আসন, কংগ্রেছে লাভ কৰিব ০-৩ খন আসন আৰু অন্যান্যই লাভ কৰিব শূন্যখন আসন।ডি. বি ৰিছার্চৰ মতে আপে লাভ কৰিব ১৬ ৰ পৰা ৩৪ খন আসন, বিজেপিয়ে লাভ কৰিব ৩৬ ৰ পৰা ৪৪ খন আসন, কংগ্ৰেছ আৰু অন্যান্যই লাভ কৰিব শূন্যখন আসন।