ডিজিটেল ডেস্কঃ ঘোষণা কৰা হ’ল হাইস্কুল শিক্ষান্ত পৰীক্ষাৰ ফলাফল৷ ২০২২ বৰ্ষত ৰাজ্যৰ মুঠ ৪,০৫, ৫৮২ গৰাকী ছাত্ৰ-ছাত্ৰী অৱতীৰ্ণ হৈছিল পৰীক্ষাত৷ তাৰ ভিতৰত ২,১৭,০১২ গৰাকী ছাত্ৰী আৰু ১,৮৮,৫৭০জন ছাত্ৰ অৱতীৰ্ণ হৈছে পৰীক্ষাত৷ আনহাতে পৰীক্ষাত উত্তীৰ্ণ হৈছে ২,২৯,১৩১ গৰাকী ছাত্ৰ-ছাত্ৰী৷ চলিত বৰ্ষত মুঠ উত্তীৰ্ণৰ হাৰ হৈছে ৫৬.৪৯ শতাংশ৷ ইয়াৰে ছাত্ৰৰ উত্তীৰ্ণৰ হাৰ ৫৮.৮০ শতাংশ আৰু ছাত্ৰীৰ উত্তীৰ্ণৰ হাৰ ৫৮.৪৯ শতাংশ৷

হাইস্কুল শিক্ষান্ত পৰীক্ষাৰ ৰিজাল্টত এইবাৰ ৮৫. ৪৬ শতাংশ উত্তীৰ্ণৰ হাৰেৰে শীৰ্ষত উজলিছে ধেমাজি৷ ধেমাজিৰ পিছতেই উত্তীৰ্ণৰ হাৰ সৰ্বাধিক ডিমা হাছাওত৷ ৮১.৩১ শতাংশৰে উত্তীৰ্ণৰ হাৰেৰে দ্বিতীয় স্থানত আছে ডিমা হাছাও, উত্তীৰ্ণৰ হাৰেৰে তৃতীয় স্থানত আছে শিৱসাগৰ জিলা৷ শিৱসাগৰত মুঠ উত্তীৰ্ণৰ শতকৰা হাৰ হৈছে ৮১.১৭ শতাংশ৷

উল্লেখ্য যে উত্তীৰ্ণ হাৰ সৰ্বাধিক কম হোৱা জিলাৰ ভিতৰত স্থান লাভ কৰিছে চিৰাং জিলাই৷ মাত্ৰ ৩৪.২৭ শতাংশ উত্তীৰ্ণৰে একেবাৰে তলৰ স্থান দখল কৰিছে চিৰাং জিলাই৷ উত্তীৰ্ণৰ হাৰ কমেৰে দ্বিতীয় স্থানত আছে হোজাই জিলা৷ হোজাইত মুঠ উত্তীৰ্ণৰ হাৰ হৈছে ৩৭.২৯শতাংশ৷