গুৱাহাটীঃ এআইইউডিএফৰ বিধায়ক আমিনুল ইছলাম মানেই যেন বিতৰ্ক। এটাৰ পিছত এটাকৈ বিতৰ্কিত মন্তব্য কৰি সততে চৰ্চিত হৈ থকা বিধায়ক আমিনুলে শেহতীয়াকৈ অসম আৰু অসমীয়াক লৈ আন এক উদ্ভট মন্তব্য কৰা দেখা গৈছে৷ সকলো সীমা চেৰাই বিতৰ্কিত বিধায়কজনে এইবাৰ প্ৰতিজন অসমীয়াক বেদখলকাৰী আখ্যা দিবলৈকো কুণ্ঠাবোধ কৰা নাই৷
নিজৰ প্ৰকৃত স্বৰূপ উদঙাই দি এটা বিশেষ সম্প্ৰদায়ক ৰক্ষণাবেক্ষণ দিবলৈ গৈ বিধায়ক আমিনুলে ছ’চিয়েল মিডিয়া ফেচবুকত এটি ভিডিঅ’ আপলোড কৰি কৈছে যে কেৱল চৰ-চাপৰিৰ মুছলমানেই নহয়, অসমৰ প্ৰতিজন লোকেই বেদখলকাৰী। ছিপাঝাৰত হোৱা শেহতীয়া উচ্ছেদ সম্পৰ্কে মন্তব্য কৰিবলৈ গৈ সমূহ অসমবাসীকে এনেদৰে বেদখলকাৰী সজালে বিতৰ্কিত বিধায়ক আমিনুল ইছলামে।
অসমত থকা প্ৰতিগৰাকী লোকেই এসময়ত বেদখলকাৰী আছিল বুলি মন্তব্য কৰি আমিনুলে কয় যে উচ্ছেদেই শেষ কথা নহয়৷ ছিপাঝাৰৰ উচ্ছেদিত লোকসকলক সংস্থাপন দিবলৈ দাবী জনাই বৰ্তমানৰ চৰকাৰখন নিৰ্ধাৰিত কিছু লোকৰহে চৰকাৰ বুলিও আন এক বিতৰ্কিত মন্তব্য কৰে বিধায়কজনে৷