ডিজিটেল ডেস্কঃ আগন্তুক পৌৰসভা নিৰ্বাচনক লৈ ব্যস্ত নেতা-মন্ত্ৰী সকলো৷ অসম চৰকাৰৰ মন্ত্ৰী তথা বিজেপি নেতা পীযুষ হাজৰিকাই শিৱসাগৰ নগৰৰ কেইবাটাও ৱাৰ্ডত ভাৰতীয় জনতা পাৰ্টী আৰু মিত্ৰদল অসম গণ পৰিষদৰ প্ৰাৰ্থীৰ হৈ প্ৰচাৰ অভিযানত ভাগ লয়৷ বিধায়ক সুশান্ত বৰগোহাঁইৰ সৈতে একেলগে নিৰ্বাচনী অভিযানত মন্ত্ৰীগৰাকীয়ে বহুকেইটা ৱাৰ্ডত প্ৰচাৰ চলায়৷ মন্ত্ৰীগৰাকীয়ে বুধবাৰে ৩, ৪, ৫, ৭, ৮, ১০, ১৩ আৰু ১৪ নং ৱাৰ্ডত নিৰ্বাচনী প্ৰচাৰ চলায়৷ প্ৰচাৰত মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত ৰাজ্য চৰকাৰৰ বিভিন্ন জনকল্যাণমূলক আচঁনিৰ বিষয়ে ৰাইজক অৱগত কৰে৷ আনহাতে শিৱসাগৰ নগৰত এটা ভাল ষ্টেডিয়াম তথা অডিটৰিয়াম নথকাৰ কথা উল্লেখ কৰি মন্ত্ৰী গৰাকীয়ে কয় যে, ৰাজনৈতিক দুৰ্বলতাৰ বাবে ঐতিহ্যমণ্ডিত নগৰখন যোৱা ২০ টা বছৰে বহুখিনি পিছপৰি ৰৈছে৷ আনহাতে বিগত সময়ত শিৱসাগৰ নগৰৰ প্ৰতিটো আত্মসহায়ক গোটক ২৫০০০ টকাকৈ সাহাৰ্য দিয়া বুলি উল্লেখ কৰি মন্ত্ৰী গৰাকীয়ে কয় যে শিৱসাগৰ নগৰখনৰ উন্নয়নৰ বাবে বিগত সময়ত চৰকাৰে প্ৰয়াস কৰিছে যদিও একমাত্ৰ ৰাজনৈতিক দুৰ্বলতাৰ বাবে নগৰখন পিছ পৰি ৰৈছে৷ অনাগত সময়ত বিজেপি আৰু ইয়াৰ সমৰ্থিত প্ৰাৰ্থীক ভোটদান কৰি নগৰখনক ৰাজনৈতিকভাৱে সবল কৰিবলৈ মন্ত্ৰীগৰাকীয়ে সকলোকে আহ্বান জনায়৷ কংগ্ৰেছ চৰকাৰৰ দিনত নগৰত সাধাৰণ নাগৰিকৰ বাবে ঘৰ দিয়াৰ কোনো ব্যৱস্থা নথকাৰ বিপৰীতে প্ৰধানমন্ত্ৰী নৰেন্দ্ৰ মোডী ডাঙৰীয়াৰ দিনত নগৰতো নাগৰিকৰ বাবে ঘৰ দিয়াৰ ব্যৱস্থা আৰম্ভ কৰা হ’ল বুলি মন্ত্ৰীগৰাকীয়ে নিজৰ ভাষণ প্ৰসংগত উল্লেখ কৰে৷ সমষ্টি এটাৰ উন্নয়নৰ বাবে স্থানীয় বিধায়ক জন চৰকাৰী পক্ষৰ হলে যথেষ্ট সুবিধা হয় বুলি উল্লেখ কৰি মন্ত্ৰীগৰাকীয়ে কয় যে অখিল গগৈ ডাঙৰীয়া বিৰোধী বিধায়ক হোৱা বাবে বহুসময়ত তেঁও ৰাজনৈতিক কাৰণত মন্ত্ৰীৰ ওচৰলৈ যাবলৈ মন নকৰে যাৰ ফলত কামবোৰ স্থবিৰ হৈ ৰোৱা দেখা যায়৷ আনহাতে শিৱসাগৰৰ ৰাষ্টা পদূলিৰ উন্নয়ন নহ’লে টীয়কত জন্ম হোৱা আৰু বৰ্তমানে গুৱাহাটীৰ বাসিন্দা হোৱা বিধায়ক অখিল গগৈৰ কোনো অসুবিধা নহয় বুলি মন্ত্ৰীগৰাকীয়ে উল্লেখ কৰে৷ এনে হোৱাৰ ফলত অসুবিধাটো কিন্তু শিৱসাগৰবাসী ৰাইজৰহে৷ অসমক আগুৱাই নিবৰ বাবে মুখ্যমন্ত্ৰী ডাঙৰীয়াৰ নেতৃত্বত চৰকাৰে যথেষ্ট প্ৰয়াস কৰা বুলি উল্লেখ কৰি মন্ত্ৰী গৰাকীয়ে কয় যে মুখ্যমন্ত্ৰীগৰাকীৰ সদিচ্ছাৰ বাবেই অৰুণোদয় আচনি তথা বিভিন্ন পেঞ্চনসমূহ প্ৰতি মাহত এটা নিৰ্দিষ্ট তাৰিখত দিয়াৰ ব্যৱস্থা কৰা হৈছে৷ আনহাতে অসমীয়া মুছলমান তথা অসমীয়া হিন্দু সকলোয়ে অসমত একেলগে, সম্প্ৰীতিৰে বাস কৰি আহিছে আৰু থাকিব বুলি উল্লেখ কৰি মন্ত্ৰী গৰাকীয়ে কয় যে তেঁওলোকে সদায়েই অসমীয়া মুছলমানক সন্মান কৰি আহিছে৷