ডিজিটেল ডেস্কঃ দেওবাৰে পুৱা জীৱন নাট সামৰি গুচি গ’ল সুৰ সাম্ৰাজ্ঞী লতা মংগেশকাৰ৷ লতাজীৰ মৃত্যুৰ লগে লগেই অনুৰাগীসকলে বিভিন্ন ধৰণেৰে সোঁৱৰিছে লতাজীক৷ কোনোৱে গীতেৰে যদি আন কোনোৱে সামাজিক মাধ্যমত শ্বেয়াৰ কৰিছে লতাজীৰ স্মৰণীয় কিছু আলোকচিত্ৰ৷ জীৱনৰ বিভিন্ন ক্ষণত ফটোগ্ৰাফাৰৰ কেমেৰাত বন্দী লতাজীৰ ছবিসমূহে আৱেগিক কৰি তুলিছে অনুৰাগীসকলক৷ ছবিসমূহৰ মাজতেই লতাজীৰ এখন বিশেষ ফটো ভাইৰেল হৈছে সামাজিক মাধ্যমত৷ ফটোখনত লতাজীৰ হাতত দেখা গৈছে এটা ৰিভলভাৰ৷ কিন্তু কিয় ৰিভলভাৰ হাতত তুলি লৈছিল সংগীত সাম্ৰাজ্ঞীগৰাকীয়ে সেই লৈ প্ৰশ্ন উত্থাপিত হৈছে বহুতৰে মনত৷

লতাজীৰ এই বিশেষ ফটোখন মুম্বাইৰ এটা ষ্টুডিঅৰ৷ য’ত চিআইডি নামৰ ধাৰাবাহিকখনৰ দৃশ্যগ্ৰহণ কৰা হয়৷ দৃশ্যগ্ৰহনৰ বাবে সাঁজু হোৱা এছপিৰ চৰিত্ৰত অভিনয় কৰা অভিনেতাগৰাকীৰ সৈতে ধেমালীৰ মাজতে এক মুহূৰ্তৰ বাবে লতাজীলৈ লৈছিল ৰিভলভাৰটো৷ ৰিভলভাৰ হাতত লোৱা এই বিশেষ পটো লগে লগেই বন্দী হৈছিল ফটোগ্ৰাফাৰৰ কেমেৰাত৷ লতাজীৰ মৃত্যুৰ খৱৰে ব্যথিত কৰাৰ সময়তে সেই ফটোখনে এতিয়া চৰ্চা লাভ কৰিছে দেশবাসীৰ মনত৷