যোৰহাটত দিনৰ পোহৰতে ডকাইতিৰ দুটা পৃথক কাণ্ড। লাখ লাখ টকা লৈ পলায়ন ডকাইতৰ। জিলা আৰক্ষী অধীক্ষক শ্বেতংক মিশ্ৰই নতুনকৈ দায়িত্ব লোৱাৰ লগে লগে যেন সক্ৰিয় হৈ পৰিছে ডকাইত। আৰক্ষীক যেন জনাইছে মুকলিকৈ প্ৰত্যাহ্বান। দুটাকৈ ডকাইতি কাণ্ডই জোঁকাৰি গৈছে যোৰহাট চহৰ। প্ৰথমটো ঘটনা সংঘটিত হ’ল বাহবাৰীৰ এখন হোটেলত আৰু আনটো ঘটনা সংঘটিত হৈছিল জিলা আৰক্ষী অধীক্ষকৰ কাৰ্যালয়ৰ সন্মুখত। জানিব পৰা মতে ৰহমান ৰোডত অৱস্থিত এখন হোটেলত সংঘটিত হ’ল প্ৰথমটো ঘটনা। পইচা ভৰ্তি বেগ এটা লৈ পলাই গ’ল ডকাইত। চিচিটিভিত বন্দী হ’ল এই ঘটনা। ঘটনাৰ বিষয়ে আৰক্ষীক অৱগত কৰাত আৰক্ষীৰ দলটোৱে ডকাইতৰ সন্ধানত অভিযান আৰম্ভ কৰে। আনহাতে দিনৰ প্ৰায় ১ বজাত জিলা আৰক্ষী অধীক্ষকৰ কাৰ্যালয়ৰ সন্মুখত আন এক ডকাইতিৰ ঘটনা সংঘটিত হয়। বাঁহফলাৰ ভূপেন পেগু নামৰ এজন ব্যক্তিৰ লগত ঘটিল এই ঘটনা। ভুক্তভোগীয়ে জনোৱা মতে, প্ৰায় এক বজাত তেওঁ SBIৰ মূল কাৰ্যালয়ৰ পৰা ২.১০ লাখ টকা লৈ জিলা কংগ্ৰেছ ভৱনৰ তলত ৰখাই থোৱা মটৰ চাইকেলখনত থয়গৈ। তেনে সময়তে ডকাইতে লুটি নিয়ে টকা ভৰ্তি বেগটো। লগে লগে আৰক্ষীক খবৰ দিয়াত ঘটনাস্থলীত উপস্থিত হৈ আৰক্ষীৰ দলটোৱে তদন্ত আৰম্ভ কৰে।