ডিজিটেল ডেস্কঃ এটা পথ ভয়ংকৰ দূৰ্ঘটনা৷ গুৱাহাটীৰ ৰাজপথত মদাহী মডেল ৰাজকন্যা বৰুৱাই মহতিয়াই নিছিল ৮ গৰাকীকৈ লোকক৷ ১ অক্টোবৰৰ নিশা ১ বজাত সংঘটিত এই ভয়াৱহ পথ দুৰ্ঘটনাত দুখনকৈ ভৰি হেৰুৱাইছিল যোছেফ মাৰাক নামৰ এজন শ্ৰমিকেও৷ ভৰি হেৰুওৱা শ্ৰমিক গৰাকীক তৎকালীনভাৱে জিএমছিএইছত ভৰ্তি কৰোৱা হয়৷ জিএমছিএইছত পূৰ্ণগতিত চলিছিল মাৰাকৰ চিকিৎসা৷ শেহতীয়াভাৱে চিকিৎসকসকলে মাৰাকক দুখন কৃত্ৰিম ভৰি লগোৱাৰো যো-জা কৰাৰ সময়তে আজি পুৱা ১০ বজাত মৃত্যুৰ ওচৰত হাৰ মানিলে যোচেফ মাৰাকে৷

জিএমচিএইছৰ অধীক্ষক অভিজিৎ শৰ্মাই যোচেফ মাৰাকৰ মৃত্যুৰ কথা সদৰি কৰি কয় যে, জোছেফৰ এখন ভৰি দুৰ্ঘটনাৰ সময়তে ছিঙি গৈছিল আৰু আনখন ভৰিও বেয়াধৰণে থেতেলা খোৱাৰ বাবেই কাটি পেলাব লগা হল৷ ২ অক্টোবৰত জিএমচিএইছত ভৰ্তি কৰোৱা যোছেফৰ বহুদিন বিচনাত পৰি থকা বাবে হাওঁফাওঁলৈ যোৱা ৰক্ত পৰিবাহী সিৰা বন্ধ হৈ পৰে লগতে সমগ্র শৰীৰত চেপ্তিক ফৰ্ম হোৱা বাবে মৃত্যু হৈছে বুলি জনাই অধীক্ষকগৰাকীয়ে৷