ডিজিটেল ডেস্কঃ বৃক্ষৰোপণ নিচা, ৪০ বছৰত ১১ লাখ গছপুলি ৰোৱা মানুহজন জয়ৰাম ৰামপ্ৰসাদ এজন খেতিয়ক। খেতিয়কৰ প্ৰধান কামেই বৃক্ষৰোপণ কিন্তু জয়ৰাম খেতিয়ক যদিও তেওঁৰ বাবে গছ পুলি ৰোৱাটো এক নিচাহে। সচৰাছৰ অন্য মানুহৰ গাত নথকা এটা নিচা। কেনেকৈ জয়ৰামৰ মনত জন্ম হৈছিল এই নিচাৰ? ককাকৰ হাতত ধৰি ঘূৰি ফুৰাৰ বয়সৰ পৰাই জয়ৰামে বাটৰ কাষত খালী ঠাই দেখিলেই সেই স্থানত গছপুলি এটা খুচি থৈ গৈছিল।

এনেকৈ ৰুই থোৱা গছপুলিটো বাঢ়ি অহা দেখিলে মন ভৰি পৰিছিল জয়ৰামৰ। প্ৰায় ১৬ বছৰ বয়সত ককাকক হেৰুৱাই জয়ৰামে। ককাকৰ মৃত্যুৱে যেন জয়ৰামক দি গ’ল জীৱনৰ উদ্দেশ্য। ককাকৰ স্মৃতিত এঘাৰ জোপা গছ ৰুবলৈ কোৱাটোৱে জয়ৰামক দিলে জীৱনৰ উদ্দেশ্য । সেই দিনটোৰ পৰাই আৰম্ভ কৰি জয়ৰামে বৰ্তমান পৰ্যন্ত ১১ লাখ গছ ৰোপণ কৰিছে। সেই ১৬ বছৰীয়া কণমানি জয়ৰাম এতিয়া ৫৬ বছৰীয়া আদহীয়া এজন লোক। মধ্যপ্ৰদেশৰ শেওপুৰ জিলাৰ বাসন্দ গ্ৰামৰ বাসিন্দা জয়ৰামে সমগ্ৰ জিলাখনকে সেউজ কৰি তোলা বিষয়টো সকলোৰে দৃষ্টিগোচৰ হোৱাটোৱে আনন্দিত কৰি তুলিছে জয়ৰামক। ৰাজহুৱা বাট-পথ, মন্দিৰ প্ৰাঙ্গন, বিদ্যালয় চৌহদ আদিকে ধৰি প্ৰায়সমূহ মুকলি অঞ্চলতে গছপুলি ৰোপন কৰিছে জয়ৰামে।