ডিজিটেল ডেস্কঃ ত্ৰিপুৰাত অব্যাহত নিৰ্বাচনী হিংসা৷ তৃণমূল কংগ্ৰেছৰ কৰ্মীক আক্ৰমণৰ লক্ষ্য কৰি লৈছে বিজেপি দলৰ কৰ্মীসকলে৷ এই অভিযোগ আনিছে প্ৰাক্তন বিজেপি নেতা বাবুল সুপ্ৰিয়ই৷ শনিবাৰে সন্ধিয়া ত্ৰিপুৰাৰ ৰাজধানী আগৰতলাত বিজেপি কৰ্মীয়ে আক্ৰমনৰ লক্ষ্য কৰি লৈছে বাবুল সুপ্ৰিয়ক বুলি অভিযোগ আনিছে তৃণমূলৰ হেভিৱেট নেতাগৰাকীয়ে৷

আগৰতলাৰ ৰামনগৰত তৃণমূলৰ হৈ প্ৰচাৰ অভিযান চলাই থাকোতে বাবুল সুপ্ৰিয়ৰ গাড়ীক লক্ষ্য কৰি শিলগুটি নিক্ষেপ কৰিছে একাংশ কৰ্মীয়ে৷ টুইটযোগে বাবুল সুপ্ৰিয়ই লিখিছে, ‘মই আগৰতলাত আক্ৰমনৰ লক্ষ্য হৈ পৰিছিলো৷ মই বহি থকা গাড়ীক উদ্দেশ্য কৰি শিলগুটি দলিওৱা হৈছিল৷ মই গাড়ীৰ পৰা নামি যোৱাৰ লগে লগে আক্ৰমনকাৰী কাপুৰুষকেইজন কেইজন পলাই যায়৷ হাস্যকৰ কথা যে বিজেপিয়ে নিজ বলে নোৱাৰি এইবাৰ শাৰিৰীকভাৱে আক্ৰমনৰ লক্ষ্য কৰি লৈছে প্ৰতিপক্ষক৷’

উল্লেখ্য যে, ত্ৰিপুৰাত তৃণমূল কংগ্ৰেছৰ উত্থানে শংকাত পেলাইছে বিজেপিক৷ কংগ্ৰেছ নেত্ৰী সুস্মিতা সেনেও শেহতীয়াভাৱে তৃণমূল কংগ্ৰেছত যোগদান কৰিছে৷ মাণিক সৰকাৰক হৰুৱাই বিজেপিয়ে দখল কৰিছিল ত্ৰিপুৰাৰ মছনদ৷ ত্ৰিপুৰাত বিজেপিৰ উত্থান যেনেদৰে হৈছিল ৫ বছৰ সম্পূৰ্ণ নৌহওঁতেই সেই উত্থানৰ যতি পৰিবলৈকে যেন আৰম্ভ হৈছে৷

মুখ্যমন্ত্ৰী বিপ্লৱ দেৱক লৈও অশান্ত হৈছে ত্ৰিপুৰাবাসী ৰাইজ৷ বিজেপি দলটোৰ প্ৰতি পূৰ্বৰ আগ্ৰহ নাইকিয়া হৈছে ত্ৰিপুৰাবাসীৰ, সেই কথা দৃষ্টিগোচৰ হৈছে বিজেপি দলটোৰ নেতা-পালিনেতাৰ৷ ইফালে নিৰ্বাচনো সমাগত৷ নিৰ্বাচনৰ প্ৰাকক্ষণত বিজেপিৰ এই খহনীয়াই দলটোৰ বাবে অশনি সংকেত কঢ়িয়াইছে৷ যাৰ বাবে এইবাৰ কৌশলেৰেই নহয়, চলে-বলে নামি পৰিছে দলটো৷

অন্যান্য দলসমূহৰ নেতা-পালিনেতাক আক্ৰমণৰ লক্ষ্য কৰি লৈছে বিজেপি পালিত একাংশ গুণ্ডাবাহিনীয়ে৷ এই অভিযোগ আনিছে তৃণমূলৰ বৰ্তমানৰ হেভিৱেট নেতা বাবুল সুপ্ৰিয়ই৷ এটাৰ পিছত আনটো টুইট কৰি বাবুল সুপ্ৰিয়ই ক্ষুৰধাৰ সমালোচনা কৰিছে এসময়ত নিজেই থকা দলটোকে৷